BQO-da 21 memlekettik qyzmetshi teris sebeptermen jumysynan bosatyldy
ORAL. KAZINFORM — Batys Qazaqstan oblysynda memlekettik qyzmetshilerdiń shtattyq sany 3 415 (ákimdikter – 2 197, ortalyq memorgandardyń bólimsheleri – 1 218) bolyp otyr.
Memlekettik qyzmet isteri agenttigi BQO boıynsha departamentiniń basshysy Murat Baısalovtyń óńirlik kommýnıkatsııa qyzmeti alańynda ótken brıfıngte málim etkenindeı, qazirgi tańda memlekettik qyzmetshilerdiń naqty sany – 3 197 (ákimdikter – 2 071, ortalyq memorgandardyń bólimsheleri – 1 126). Bos laýazymdar sany – 218 (ákimdikter – 126, ortalyq memorgandardyń bólimsheleri – 92), bul – jalpy shtattyq sannyń 6,4 paıyzy.
Murat Seıilbekulynyń sózine qaraǵanda, jyl basynan beri ákimshilik memlekettik qyzmetke barlyǵy 137 adam taǵaıyndalǵan. Memlekettik qyzmetshilerdiń 1 315-i nemese 41 paıyzy – erler, 1 882-si nemese 59 paıyzy – áıelder.
- Memqyzmet týraly zańnama talaptary men qyzmettik ádep normalarynyń saqtalýyn baqylaý fýnktsııalaryn júzege asyrý aıasynda bıyl 45 baqylaý is-sharasy júrgizilip, nátıjesinde 2 087 buzýshylyq anyqtaldy. Memlekettik organdarǵa 14 nusqama men usyný engizilip, onyń 11-i oryndaldy. Qalǵan úsheýi oryndalyp jatyr. Engizilgen usyný men nusqamalardy qaraý nátıjeleri boıynsha túzetilýge jatatyn memlekettik qyzmet salasyna qatysty 428 buzýshylyq qalpyna keltirildi, - dedi M.Baısalov.
Onyń aıtýynsha, ádep jónindegi keńeste tártiptik isterdi qaraý nátıjeleri boıynsha 6 laýazymdy qyzmetkerge túrli tártiptik jaza qoldanyldy.
Departament basqarýshylyq qyzmet atqaratyn adamdardyń «Sybaılas jemqorlyqqa qarsy is-qımyl týraly» Zańmen kózdelgen memlekettik kirister organdaryna deklaratsııalardy tapsyrý jumystaryna monıtorıng júrgizdi. Nátıjesinde bilim berý, densaýlyq saqtaý, mádenıet, sport, veterınarııa salalaryndaǵy uıymdardyń, sondaı-aq oblystyń qala jáne aýdan ákimdikterine qarasty birqatar mekemeniń 100 laýazymdy qyzmetkeri deklaratsııalardy belgilengen merzimde tapsyrmaǵany nemese múldem tapsyrmaǵany anyqtaldy. Soǵan sáıkes kináli tulǵalarǵa qatysty 90 tártiptik jaza qoldanyldy.
- Sonymen birge ótken jyldan búgingi kúnge deıin oblysta 21 memlekettik qyzmetshiniń áreketinde kózdelgen shekteýlerdi saqtamaý belgileri anyqtaldy. Keıbir memlekettik qyzmetshilerdiń kásikerlikpen aınalysý derekteri oryn alǵan. Memlekettik qyzmetshiler arasynda lýdomanııa derekteri de kezdesedi. Atalǵan derekter boıynsha olardyń barlyǵyn qyzmetten teris sebeptermen bosatý týraly sheshim qabyldandy, - dep qosty M.Baısalov.
Eske sala keteıik, budan buryn BQO-da sessııa otyrysynda daýys kótergen aýyl ákimine qatań sógis berilgenin jazǵan edik.
