BQO-da 2027 jylǵa deıin 54 ınvestıtsııalyq joba júzege asady

ASTANA. KAZINFORM — Batys Qazaqstan oblysynda jyl basynan beri agrarlyq salaǵa 50,6 mlrd teńgege qoldaý kórsetilgen. Bul týraly oblys ákimi Narıman Tóreǵalıev eseptik kezdesýinde aıtty.

Óńir basshysynyń aıtýynsha, aýyl sharýashylyǵyndaǵy jalpy ónim kólemi 6,4%-ǵa artyp, 281 mlrd teńgege jetti.

— 2025-2027 jyldary aýyl sharýashylyǵy salasynda jalpy quny 68,1 mlrd teńge bolatyn 54 ınvestıtsııalyq joba júzege asyrylady, osylaısha 870 jumys ornyn qurý josparlanǵan. Al bıyldyń ózinde 15,4 mlrd teńge bolatyn 18 joba iske asyrylyp jatyr. Olar: 1,5 myń gektar sýarmaly jerdi aınalymǵa engizý boıynsha 5 joba, 4,8 myń tonnalyq 2 taýarly sút fermasy jáne 3 myń basqa arnalǵan bordaqylaý alańy, — dedi N. Tóreǵalıev elordada Ortalyq kommýnıkatsııalar qyzmetinde.

2027 jylǵa deıin 29 myń basqa arnalǵan 11 bordaqylaý alańdaryn iske qosý josparlanyp otyr. Jobalardy júzege asyrý arqyly oblystaǵy bordaqylaý alańdarynyń jalpy syıymdylyǵy 75 myń basqa jetedi.

Investıtsııalyq jobalardy júzege asyrýda sońǵy 3 jylda respýblıkalyq bıýdjetten arnaıy baǵdarlama aıasynda 21 mlrd teńge qarajat bólinip, 12 joba qarjylandyrylǵan.

Sonyń ishinde 5 sút-taýarly ferma, 2 kókónis saqtaý qoımasy, 2 bordaqylaý alańy, 2 sútti qaıta óńdeý kásiporyndaryn qurý jobalary bar. Bul jobalar óńirdiń sút ónimderimen qamtamasyz etý deńgeıin 22,3%-dan 39%-ǵa deıin arttyrady.

— Oblysta aýyl sharýashylyǵy ónimderin qaıta óńdeıtin negizgi 23 kásiporyn jumys jasaýda. Ótken jyly qaıta óńdelgen ónim kólemi 208 myń tonnany nemese 64,5% qurady. Bul kórsetkishti 2026 jyly 70%-ǵa jetkizýimiz qajet, — dedi Narıman Tóreǵalıev.

Aıta keteıik, bıyl Batys Qazaqstan oblysynyń bıýdjeti 33,5% ulǵaıyp, 634 mlrd teńgege jetti.