BQO-da 2025 jylǵa deıin 37,8 myń gektar sýarmaly jerdi qoldanysqa engizý kózdelip otyr
BQO kásipkerlik jáne ındýstrıaldy-ınnovatsııalyq damý basqarmasynyń basshysy Jumageldi Batyrnııazovtyń oblys ákimdiginde azyq-túlik qaýipsizdigin qamtamasyz etý máselelerine arnalǵan keńeste málim etkenindeı, sonyń ishinde bıyl 5061 gektar sýarmaly jerdi paıdalanýǵa berý josparlanýda.
Onyń aıtýynsha, Memleket basshysy Qasym-Jomart Toqaev Qazaqstan halqyna Joldaýynda elimizde azyq-túlik qaýipsizdigin qamtamasyz etýdiń mańyzy zor ekendigin atap ótti. Birqatar óńirlerde jaýyn-shashynnyń azdyǵy jemshóptiń jetispeýine ákep soqtyrýy múmkin ekendigin umytpaýdy eskertti.
Osyǵan oraı 2030 jylǵa deıin Qazaqstanda 600 myń ga, onyń ishinde Batys Qazaqstanda 50 myń ga jańa sýarmaly jerdi qoldanysqa engizý jóninde tapsyrma berildi.
Soǵan sáıkes óńirde 2021-2025 jyldarǵa arnalǵan Sý sharýashylyǵyn damytýdyń jol kartasy da daıyndalyp, bekitildi.
Sol sekildi Batys Qazaqstan oblysynyń 2021-2030 jyldarǵa arnalǵan óńirlik balyq sharýashylyǵyn damytý baǵdarlamasy bekitilip, ony oryndaý maqsatynda nysandar men sharýashylyqtardyń túrleri boıynsha jol kartalary ázirlendi. Baǵdarlamaǵa sáıkes 2030 jylǵa deıin 10 myń tonna taýarly balyq ósirý kózdelgen. Osyǵan oraı, oblystaǵy qolaıly sý aıdyndary kólde-taýarly balyq ósirý jáne torda balyq ósirý sharýashylyǵy úshin tabıǵat paıdalanýshylarǵa bekitilýde. 2021 jyly 11 tabıǵat paıdalanýshymen 147,2 tonna taýarly balyq ósirildi.
- Aýyl sharýashylyǵy salasyn sýmen qamtamasyz etýde sýarý-sýlandyrý júıeleriniń mańyzy zor. Ońtústik aýdandardy sýmen qamtamasyz etýde Jaıyq-Kóshim júıesiniń orny bólek, 1970 jyldan beri paıdalanylyp kele jatqan júıeni qalpyna keltirý úshin QR Premer-Mınıstri men Ekologııa, geologııa jáne tabıǵı resýrstar mınıstriniń óńirimizge jumys sapary nátıjesinde birqatar jobalar qoldaý tapty, - deıdi J.Batyrnııazov.
Onyń biri – jalpy quny 2,7 mlrd teńgeni quraıtyn Kırov-Shejin kanalynyń 4-kezeńin qaıta jańǵyrtý jumystary.
Ekinshisi – jobalyq quny 2,6 mlrd teńgeni quraıtyn Kırov sý qoımasyn rekonstrýktsııalaý jumystary, joba respýblıkalyq bıýdjetten qarjylandyrylýda.
Úshinshisi – uzyndyǵy 68 km Shaǵan aǵyny (46,8 km) men Kóshim kanalyn (22 km) mehanıkalyq tazartý boıynsha JSQ daıyndaldy, joba memlekettik saraptamadan ótýde. Boljamdy quny – 2,3 mlrd teńge. Jobany 2023 jyly respýblıkalyq bıýdjet esebinen oryndaý josparlanyp otyr.
Júıe arqyly bes aýdannyń 2 mln ga jaıylymy men 355,9 myń bas iri qara, 765,2 myń bas usaq mal men 129,6 myń bas jylqysy sýmen qamtamasyz etilip otyr. 2025 jylǵa deıin mal azyǵyn daıyndaý úshin 8 myń ga jańa turaqty sýarmaly jerdi qoldanysqa engizý josparlanyp otyr. Bul 24 myń tonna ónim alýǵa múmkindik beredi.
Basqarma basshysynyń pikirinshe, júıeniń jobalyq qabiletin tolyq paıdalaný úshin búgingi kúni osy nysandardy bir organ basqarý qajettiligi týyndap otyr.
Ońtústik aýdandardy sýmen qamtamasyz etýde Qaraózen men Saryózen jáne Jánibek júıesiniń mańyzy zor.
QR Úkimetiniń qoldaýymen 2021 jyly Reseıden bul júıege barlyǵy 172 mln tekshe metr, sonyń ishinde Qaraózen men Saryózenge 147,0, Jánibekke 25 mln tekshe metr sý tasymaldandy. Qazirgi ýaqytta birqatar sý qoımalarynyń tolýy 50 paıyzdan artyq.
Júıe tórt aýdannyń 1 mln ga jaıylymy men 309,7 myń bas iri qara, 475,2 myń bas usaq mal men 199,5 myń bas jylqyny sýmen qamtyp otyr. 2025 jylǵa deıin tórt aýdan aýmaǵynda mal azyǵyn daıyndaý úshin 4,6 myń ga jańa turaqty sýarmaly jerdi qoldanysqa engizý josparlanyp otyr. Bul 13,8 tonna ónim alýǵa múmkindik beredi.
J.Batyrnııazovtyń sózine qaraǵanda, Jaıyqtyń sol jaǵalaýynda turaqty sý kózi joq, bul mal sharýashylyǵyna qolaıly jaıylymdardyń múmkindigin tolyq paıdalanýǵa shekteý bolyp otyr. Qazirgi tańda Aqjaıyq aýdanynda mal basynyń 74,1 paıyzy Jaıyqtyń oń jaǵalaýynda shoǵyrlanǵan, turaqty sý kózi bolǵan jaǵdaıda mal basy sanyn arttyrýǵa múmkindik týady.
Jaıyq ózeniniń sol jaǵalaýyn sýmen qamtamasyz etý jáne jaıylymdarǵa sý shyǵarý úshin jalpy somasy 4,2 mlrd teńge bolatyn, jalpy uzyndyǵy 185,6 km 3 magıstraldy kanaldy qaıta qurý bastaldy. Aqjaıyq aýdany ákimdigi arnaıy tehnıka kúshimen Aşy-Aznabaı-Taıpaq sýlandyrý júıesin qalpyna keltirý jobasyna kirmeı qalǵan 60 km kanal bóligin tazartý jumystaryn josparlap otyr.
2025 jylǵa deıin Terektide 13,5 myń ga jerdi qoldanysqa engizý maqsatynda Barbastaý ózenine jáne Aqjaıyq aýdanyndaǵy sýmen qamtý máselelerin sheshý úshin Baǵyrlaı jyrasyna sý berý úshin nasos stantsııasy qurylystary qolǵa alynǵaly otyr. Bul 40,5 myń tonna ónim alýǵa múmkindik beredi.
«Eldi mekenderdiń turmystyq qajettilikterine paıdalaný, jaıylymdaǵy ormandardy sýlandyrý, jer asty sýynyń deńgeıin kóterý úshin Jaıyq ózeniniń eski arnalaryn tazalaý jumystary qolǵa alyndy», dedi J.Batyrnııazov.
Eske sala keteıik, budan buryn BQO-da azyq-túlik qaýipsizdigin qamtamasyz etý baǵytynda 94 ınvestıtsııalyq joba júzege asyrylyp jatqanyn jazǵan bolatynbyz.
Sondaı-aq Batys Qazaqstanda 521 myń gektarǵa aýyl sharýashylyǵy daqyldaryn egý kózdelip otyr.