BQO-da 2022 jyly 4 adamnan menıngokokk ınfektsııasy anyqtalǵan

ASTANA. QazAqparat - Batys Qazaqstan oblysynda 2022 jyldyń 12 aıynda 4 adamnan menıngokokk ınfektsııasy anyqtaldy, dep habarlaıdy QazAqparat QR DSM Sanıtarlyq-epıdemıologııalyq baqylaý komıtetiniń baspasóz qyzmetine silteme jasap.

Baspasóz qyzmetiniń málimetterine qaraǵanda, 100 myń turǵynǵa shaqqanda aýrýshańdyq kórsetkishi 0,60 qurady. Tirkelgen jaǵdaılardyń barlyǵy 14 jasqa deıingi balalar arasynda anyqtalyp otyr.

Menıngokokk ınfektsııasy – ártúrli klınıkalyq kórinisteri bar eń aýyr jedel juqpaly aýrýlardyń biri. Infektsııa balalar arasynda jıi kezdesedi, kóbinese ınfektsııa bir jasqa tolmaǵan balalarǵa jıi juǵady.

Infektsııa kózi – aýrý adam. Taralý joly – aýa-tamshysy arqyly. Infektsııa murynnyń, aýyz qýysynyń jáne jutqynshaqtyń shyryshty qabaty arqyly aǵzaǵa enedi. Menıngokokk ınfektsııasynyń ınkýbatsııalyq kezeńi ortasha eseppen 4 kúndi quraıdy, biraq ol 2-den 10 kúnge deıin de bolýy múmkin.

Aýrýdyń birinshi kezeńinde barlyq belgiler turaqty sıpatta bolady, sondyqtan kóbinese mı qabyǵynyń qabynýynyń bastalýyn sýyq tııý nemese JRVI dep kóptegen adam qatelesedi.

Negizgi belgileri:

Bastyń aýyrýy. Aldymen ol bas aınalý, jeńil syrqattaný retinde kórinýi múmkin, ýaqyt óte kele bas saqınasy sııaqty turaqty sıpatqa ıe bolady.

Tábettiń bolmaýy. Sonymen birge tamaqtyń qurǵaýyna baılanysty únemi sý ishkisi kele beretindigi baıqalady.

Kishkentaı patsıentterde dıareıa paıda bolady.

Jalpy álsizdik, deneniń aýyrsynýy.

Jaryqqa, qatty dybystarǵa jáne bir nárseniń janasýyna qatty reaktsııa paıda bolady.

Dene qyzýy kóteriledi.

Menıngokokk ınfektsııasynyń aldyn alý:

- kataraldy qubylystardyń alǵashqy belgileri paıda bolǵan kezde (bas aýrýy, dene qyzýynyń joǵarylaýy, tamaqtyń qyzarýy, álsizdik) dárigerge qaralý;

- adamdar kóp jınalatyn oryndarǵa (mádenı-buqaralyq is-sharalar, saýda-oıyn-saýyq ortalyqtaryndaǵy oıyn alańdary) barýdy shekteý;

- naýqaspen baılanysty boldyrmaý, betperde paıdalaný;

- jeke gıgıenany saqtaý, qoldy muqııat jýý;

- menıngıttiń damýyna sebep bolatyn LOR organdarynyń jedel jáne sozylmaly juqpaly aýrýlaryn ýaqtyly emdeý;

- deneni shynyqtyrý jáne sportpen shuǵyldaný.

Aýrýdyń belgileri paıda bolǵan kezde, ózin-ózi emdeýge bolmaıdy, aýrý aýyr asqynýlarǵa alyp kelmeýi úshin tezirek dárigerge qaralý kerek.