BQO-da 2012 jyldan beri ana ólimi tirkelgen joq
ASTANA. 16 qazan. QazAqparat - Bala ólimi 12 paıyzǵa tómendedi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Batys Qazaqstan oblysynyń ákimi Nurlan Noǵaev málim etti.
«Densaýlyq saqtaý salasyna toqtalatyn bolsaq, 2012 jyly jáne bıylǵy 8 aıdyń qorytyndysy boıynsha oblysta ana ólimi tirkelgen joq. Bala ólimi 12 paıyzǵa tómendedi», - dedi ákim.
N. Noǵaevtyń sózine qaraǵanda, oblysta ortasha ómir uzaqtyǵy 69 jasty qurap otyr. 2012 jyly 12 myń 500 sábı dúnıege keldi.
Taratylǵan málimetterge qaraǵanda, óńirde densaýlyq saqtaýdyń 2013 jylǵa naqtylanǵan bıýdjeti 19,4 mlrd. teńgeni qurady. Sonyń ishinde respýblıkalyq bıýdjettiń nysanaly transfertteri - 7,2 mlrd. teńge. Kepildik berilgen tegin medıtsınalyq kómek kóleminiń qarajattary 17,9 mlrd. teńgeni qurady.
