BQO-da 20 tonna jumyrtqany zańsyz tasymaldaýǵa tosqaýyl qoıyldy
ORAL. KAZINFORM — Batys Qazaqstan oblysynda «Syrym» veterınarııalyq baqylaý beketinde zań buzýshylyq anyqtaldy.
Aýyl sharýashylyǵy mınıstrligi Veterınarııalyq baqylaý jáne qadaǵalaý komıteti BQO aýmaqtyq ınspektsııasynan málim etkenindeı, Reseıdiń Samara qalasynan Astanaǵa baǵyt alǵan júk kóligi tekserilgen.
Qarap-tekserý UQK Shekara qyzmetiniń BQO boıynsha departamenti qyzmetkerleri men kezekshiliktegi memlekettik veterınarııalyq-sanıtarııalyq ınspektorlardyń qatysýymen júrgizilgen.
Tekserý barysynda 20 tonna taǵamdyq taýyq jumyrtqasyn Qazaqstan aýmaǵyna tıisti veterınarııalyq ilespe qujattarsyz ákelýge áreket jasalǵany anyqtaldy.
Nátıjesinde júk kóligi shyǵý baǵytyna keri qaıtarylyp, júrgizýshige QR Ákimshilik quqyq buzýshylyq týraly kodeksiniń 406-baby boıynsha ákimshilik hattama toltyrylyp, aıyppul salyndy.
Aýyl sharýashylyǵy mınıstriniń 2026 jylǵy 17 sáýirdegi №146 buıryǵyna sáıkes, Qazaqstan aýmaǵyna barlyq kólik túrlerimen úshinshi elderden jáne Eýrazııalyq ekonomıkalyq odaqqa múshe memleketterden taýyq jumyrtqalaryn ákelýge 2026 jylǵy 21 sáýirden bastap alty aı merzimge tyıym salynǵan.
Inspektsııa málimetine sáıkes «Syrym» veterınarııalyq baqylaý beketinde jyl basynan beri 216 zań buzýshylyq belgili bolyp, sonshama avtokólik shyǵý baǵytyna keri qaıtaryldy. 90 júk tasymaldaýshyǵa ákimshilik hattama toltyrylyp, 8 mln 044,5 myń teńge aıyppul salyndy.
Eske sala keteıik, budan buryn BQO-da júk tasymaldaýshylar tarapynan 200-den astam zań buzýshylyq anyqtalǵanyn jazǵan edik.
