BQO-da 20 myń balaǵa qyzylshaǵa qarsy qosymsha ekpe salyndy

Batys Qazaqstan oblysynda adamdardyń qyzylshamen aýyrýy ósip, epıdemıologııalyq jaǵdaı qolaısyz bolyp otyr, dep habarlaıdy Kazinform.

BQO sanıtarııalyq-epıdemıologııalyq baqylaý departamentiniń basshysy Muqamǵalı Aryspaevtyń óńirlik kommýnıkatsııalar qyzmeti alańynda ótken brıfıngte málim etkenindeı, óńirde osy kezge deıin 466 adam qyzylshaǵa shaldyqsa, sonyń 334-i Oral qalasynda tirkelgen.

Sondaı-aq Bórli (52), Syrym (26), Báıterek (18), Kaztalov (11) aýdandarynda kóbirek ushyrasyp otyr.

Departament basshysynyń sózine qaraǵanda, syrqattanǵandardyń 46-sy – 1 jasqa deıingiler, 149-y – 1-4, 88-i – 5-14, 46-sy – 15-18 jas aralyǵyndaǵylar, 134-i – eresek adamdar.

Kúni búgin qyzylsha tirkelgen 18 nysan medıtsınalyq baqylaýǵa alynsa, sonyń 11-i – mektep, jeteýi – balabaqshalar. Bularda epıdemııaǵa qarsy is-sharalar kesheni júrgizilýde.

«Bıylǵy 6 qarashadan bastap qyzylshaǵa qarsy qosymsha jappaı ımmýndaý naýqany barysynda 5 jasqa deıingi 20 myńnan astam bala ekpemen qamtyldy. Sonymen qatar 18 jasqa deıingi, buryn ýaqtyly egilmegen jáne de qyzylsha oshaqtarynda ekpe týraly málimetteri joq 30 jasqa deıingi adamdarǵa 72 saǵat ishinde shuǵyl vaktsınatsııa jasalady. Aldaǵy jańajyldyq mereke kúnderine baılanysty juqpaly dertterdiń aldyn alý maqsatynda turǵyndarǵa qyzylshaǵa qarsy egilmegenderi bolsa, ekpe alý qajettigin eske salamyz. Oǵan qosa jeke qorǵaný sharalaryn saqtap, adamdar kóp jınalatyn jerlerge barmaǵan jón. Tumaý, JRVI, qyzylsha aýrýynyń alǵashqy belgileri baıqalǵan kezde dáriger kómegine júginý qajet», - dedi M.Aryspaev.

Eske sala keteıik, budan buryn BQO-da qyzylsha juqtyrǵan 56 adamnyń statsıonarda emdelip jatyrǵanyn jazǵan edik.