BQO-da 20 eldi mekendi sý basý qaýpi seıilmeı otyr

Oblys ákiminiń orynbasary Baǵdat Azbaevtyń sózine qaraǵanda, Tasqala, Báıterek aýdandary men Oral qalasy mańyndaǵy eldi mekenderge kóbirek qaýip tónip tur.

Bıyl qys óte qarly boldy. Mundaı jaǵdaı sońǵy otyz jyldan astam ýaqyttan beri oryn almaǵan edi.

«Qazgıdromet» RMK derekteri boıynsha bıylǵy aqpanda ózen-kólderdegi ylǵal qory 50-100 paıyzǵa joǵary boldy. Qar 1,5-3 ese kóp tústi. Topyraqtyń qatý tereńdigi 30-50 santımetrdi qurady.

Bastapqyda oblysta 36 myńnan astam adam turatyn 88 eldi mekendi sý basý qaýpi bar delinse, qazir ol 20-ǵa deıin tómendedi.

Oblys kóleminde qala men aýyldardan 1,5 mln astam tekshe metr qar shyǵarylyp, 56 myń tekshe metr sý soryldy. 110 myń metr arna, aryqtar tazartylyp, bóget bekitý, muz kesý jumystary da júrgizildi.

Kóktemgi sý tasqynyna qarsy sharalarǵa 885 mln teńge bólindi.

Oral qalasynyń ákimi Murat Muqaev shahardaǵy kommýnaldyq mekemelerdiń 19 qarashada qar túskennen beri tórt aı boıy tynym tappaı jumys jasaǵanyn jetkizdi. Bul jumystarǵa 400-ge jýyq qyzmetker, 350-den astam tehnıka jumyldyryldy. Buryn qar jınaıtyn 2 polıgon bolsa, bıyl onyń sany jeteýge jetip, bári de qarǵa toldy. Buǵan «Jaıyq taza qala», «Oral taza servıs» mekemeleri men qurylys, jol kompanııalary súbeli úles qosqanyn aıtýǵa bolady.

BQO TJ departamentiniń bastyǵy Jasulan Jumashevtiń aıtýynsha, óńirdegi ózenderdiń deni bastaýyn Reseıden alatyndyqtan, Saratov jáne Orynbor oblystaryndaǵy áriptestermen sý tasqynyn qaýipsiz ótkizý, Varfolomeev jáne Irıkla sý qoımalaryn tıimdi paıdalaný baǵytynda turaqty baılanys jolǵa qoıylǵan.

Samara qalasyndaǵy Prıvolje gıdrometeorologııa jáne qorshaǵan ortaǵa monıtorıng júrgizý basqarmasynyń derekterine qaraǵanda, Jaıyq ózenindegi sý deńgeıi (Oral qalasy men Kóshim aýyly tusynda) 400-500 santımetrge (qaýipti deńgeı - 850 sm) kóteriledi dep boljanýda. Sý tasqyny 4-10 sáýir aralyǵynda bolmaqshy.

Qaraózen men Saryózende kóktemgi sý tasqyny qalyptaǵydan joǵary, biraq qaýip tóndirmeıdi dep boljanýda.

Oblys aýmaǵynda barlyǵy 58 gıdrotehnıkalyq qurylym bolsa, sonyń 24-i respýblıkalyq menshikke jatady. Respýblıkalyq qurylymdardaǵy ortasha sý tolý kórsetkishi - 42 paıyz. Barlyǵy 7 gıdrotehnıkalyq qurylym jóndeýdi qajet etedi.

Bıylǵy 25 aqpannan bastap ózenderde muz kesý jumystary júrgizildi. Mysaly, Derkól jáne Shaǵan ózenderinde 28420 oıyq oıylyp, 215,2 myń tekshe metr muz kesildi.

Muz kesý jumystary ekologııa jaǵynan da tıimdi, ıaǵnı qorshaǵan ortaǵa zııanyn tıgizbeıdi.

«Sý tasqyny bola qalǵan jaǵdaıda 2443 adam, 707 tehnıka, 51 júzý quraly, 266 motopompa ázir. Sondaı-aq 156 tonna janar-jaǵar maı, 125 myń dana qap, 18 myń tonna ınertti materıaldar bar. Oblystyq bıýdjetten aerovızýaldyq tekserýler júrgizýge tikushaq tartý úshin 14,6 mln, ǵaryshtyq monıtorıng jasaýǵa 6,5 mln teńge qaralǵan. Oblys boıynsha 50, sonyń ishinde Oral qalasynda 28 evakýatsııalyq qosyn belgilendi», dedi Jasulan Jumashev.

Eske sala keteıik, budan buryn Batys Qazaqstanda 88 eldi mekendi sý basýy múmkin ekendigin jazǵan bolatynbyz.