BQO-da 20-dan astam adam búırek sındromdy gemorragııalyq qyzba dertin juqtyrǵan

ORAL. KAZINFORM — Batys Qazaqstan oblysynda bıylǵy on aıda 22 adamnyń búırek sındromdy gemorragııalyq qyzba aýrýymen syrqattanǵany belgili boldy.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń málim etkenindeı, bul ótken jylǵy osy kezeńdegiden (3) áldeqaıda kóp.

Onyń sózine qaraǵanda, tyshqan tárizdi kemirgishterden juǵatyn derttiń segizi Bórli, altaýy Báıterek, ekeýi Terekti aýdanynda, altaýy Oral qalasynda tirkeldi.

- Naýqastardyń kemirgishter júretin jerlerde bolǵany, balyq aýlaýǵa shyǵyp, shóp shabý jumystaryna qatysqany anyqtaldy. Búırek sındromdy gemorragııalyq qyzba aýrýynyń aldyn alý úshin shóp, bıdaı, bıdaı ónimderimen jumys istegen kezde jáne kemirgishter bolýy múmkin shańdy bólmelerde respırator qoldaný qajettigin eske salamyz. Kemirgishtermen lastanǵan bolýy múmkin ónimderdi paıdalanbaý kerek. Sonymen qatar ákimdikter tarapynan deratızatsııalyq jumystar júrgizilgeni jón, - dedi N.Mustaev.

Departament derekterine sáıkes oblys kóleminde tyrysqaq, qutyrý, oba, sibir jarasy, ish súzegi, qyzamyq, dıfterııa, polıomıelıt, sirespe, bezgek jáne botýlızm tirkelgen joq. Sondaı-aq 16 juqpaly aýrýlar boıynsha kórsetkishtiń tómendegeni baıqalady.

Eske sala keteıik, budan buryn BQO-da 177 mektepte 440-tan astam oqýshynyń JRVI-men aýyrǵanyn jazǵan edik.