BQO-da 20,9 mlrd teńgege 286 km jol jóndelmekshi
ORAL. QazAqparat - Batys Qazaqstan oblysynda bıyl 20,9 mlrd teńgege 286 km jol jóndeý josparlanýda, dep habarlaıdy «QazAqparat» tilshisi.
BQO jolaýshylar kóligi jáne avtomobıl joldary basqarmasynyń basshysy Mırjan Satqanovtyń aıtýynsha, sonyń ishinde 13,6 mlrd teńge respýblıkalyq mańyzy bar 223,7 km joldy jóndeýge qarastyrylǵan. Osy qarjyǵa Oral-Tasqala-RF shekarasy jolynyń 31-104 km aralyǵyn qaıta salý kózdelýde. Taǵy bir mańyzdy baǵyt - Chapaev-Jalpaqtal-Qaztalov-RF shekarasy jolyn (157-192 km) kúrdeli jóndeý jalǵasady. Samara-Shymkent avtojoly boıynda Qazaqstan-Reseı shekarasyndaǵy «Syrym» ótkizý beketi de kúrdeli jóndeledi. Al Oral-Atyraý (206-311 km), Samara-Shymkent (330-408 km) baǵytyndaǵy joldar ortasha jóndeýden ótedi.
Óńirde sońǵy kezde oblystyq jáne aýdandyq mańyzy bar avtojoldardy retke keltirýge erekshe kóńil bólinýde. Bul maqsatqa 3,2 mlrd teńge qaralyp, 20,5 km jol jóndelmekshi. Atap aıtqanda, Bórli-Aqsaı-Jympıty jolynyń 38-53 km jáne 53-68 km aralyqtary qaıta jańǵyrtylady. Budan bólek Úlken Shaǵan-Peremetnyı-Vechnyı jolynyń 0-10 km, 10-20 km jáne 20-32 km aralyqtary kúrdeli jóndeledi. Sonymen qatar birneshe baǵyt boıynsha jobalyq-smetalyq qujattama jasalady.
Oǵan qosa 2,6 mlrd teńge qarajatqa 28,3 km aýdandyq mańyzy bar jáne aýyldardaǵy kóshe joldaryn jóndeý oılastyrylýda.
Oblys ortalyǵynda da jol jóndeý kún tártibinen túspek emes. Bıyl Oralda 1,5 mlrd teńgege (239,5 mln teńge - jergilikti bıýdjet, 1285,6 mln teńge - «QPO b.v.» kompanııasy esebinen) 13,4 km jol jóndelmekshi.
«Jyl ishinde bul kórsetkishter áli de naqtylanady», dedi M.Satqanov.
Aıta keteıik, 2017 jyly 33,3 mlrd teńgege 419 km jol jóndelgen bolatyn. Sonyń ishinde 14,1 mlrd teńge respýblıkalyq mańyzy bar joldarǵa (170,2 km), 6,2 mlrd teńge oblystyq jáne aýdandyq joldarǵa (128,5 km) jumsaldy. Respýblıkalyq jáne jergilikti joldardy aǵymdaǵy jóndeý men kútip ustaýǵa sáıkesinshe 950 mln jáne 432 mln teńge qaraldy. 8,7 mlrd teńge Oral qalasynyń avtojoldaryna (61 kóshe, 65,3 km) baǵyttaldy. Oraldyń avtojoldaryn aǵymdaǵy jóndeý men kútip ustaýǵa 400 mln teńge ketti. Sondaı-aq aýdandyq mańyzy bar jáne aýdandardaǵy eldi mekender kóshelerin jóndeýge 4,3 mlrd teńge (54 kóshe, 54,8 km), kútip ustaýǵa 724,82 mln teńge berildi.
