BQO-da 2 júkti áıel sý basqan aımaqtan tikushaqpen Oralǵa jetkizildi

ORAL. QazAqparat – Batys Qazaqstan oblysynda sý basqan aımaqtan 2 júkti áıel tikushaqpen Oralǵa jetkizildi, dep habarlaıdy QazAqparat tilshisi.

BQO Tótenshe jaǵdaılar departamentiniń jedel shtabynan málim etkenindeı, oqıǵa Jánibek aýdany Jaqsybaı aýylynda boldy.

Óńirge kómekke kelgen Atyraý oblysy TJ departamentiniń kúshimen Jaqsybaı aýylynda turǵyn úılerden sý sorylýda.

Aýylda barlyǵy 97 úı sýǵa ketse, qazir sonyń 57-sinde jumystar júrgizilýde.

«QazAvıaQutqarý» tikushaǵymen Jaqsybaı aýylynan 37 jáne 25 jastaǵy júkti eki kelinshek Oralǵa jetkizilip, týystaryna tapsyryldy.

TJ departamenti málimeti boıynsha óńirde osy kezge deıin 140 úı sýǵa ketti.

Qazirgi kezde oblysta sý tasqynyna qarsy kúres jalǵasýda.

Eske sala keteıik, budan buryn BQO-nyń taǵy bir aýdanynda tótenshe jaǵdaı jarııalanǵanyn, 170-ten astam turǵyn úıdi sý basqanyn jazǵan bolatynbyz.

Sondaı-aq tasqyn sý shaıyp ketken soń birneshe kólik joly jabyldy.