BQO-da 2 jasar balanyń dáriden ýlanyp ólmegeni anyqtaldy - Oblystyq densaýlyq saqtaý basqarmasy
ASTANA. QazAqparat - 2 jasar Aldııar Amangeldi antıbıotık dárilerden ýlanbaǵan. Bul týraly Densaýlyq saqtaý departamentiniń brıfınginde Batys Qazaqstan oblysynyń bas pedıatry Aınash Ǵubaıdýllına málimdedi, dep habarlaıdy Astana telearnasy.
Batys Qazaqstan oblysynyń bas pedıatrynyń aıtýynsha, Bókeı ordasy aýdandyq aýrýhanasynyń dárigerleri balaǵa statsıonarlyq em qabyldaý kerektigin aıtqan. Alaıda, búldirshinniń anasy odan bas tartyp, ulyn úıinde emdegen. Qaıǵyly oqıǵanyń mán-jaıyn anyqtaý úshin arnaıy komıssııa quryldy.
«Antıbıotıkten ýlanǵan degen pikir - qate pikir. Sebebi ondaı kóp antıbıotık balaǵa taǵaıyndalmaǵan. Tek qana bir antıbıotık alǵan, ol da oraldy antıbıotık, «ospomaks» degen jeńil antıbıotık alǵan. Patalog-anatomııalyq qorytyndy shyqty, onda dáriden ýlanǵan degen uıǵarym joq», - dedi Ǵubaıdýllına.
Eske salaıyq, Batys Qazaqstan oblysyndaǵy Bókeı Ordasy aýdanynyń turǵyny Nurgúl Tóleýǵalıeva eki jasar balasy Aldııar Amangeldiniń ólimine dárigerlerdi kinálaǵan edi. Onyń aıtýynsha, dárigerler balasyn teris emdegen. Qazir balanyń ólý sebebin anyqtaý úshin qylmystyq is qozǵaldy.
