BQO-da 2 myńnan astam iri qaradan brýtsellez aýrýy anyqtaldy
BQO veterınarııa basqarmasynyń basshysy Serik Nurmaǵanbetovtiń málim etkenindeı, maldyń zaqymdaný kórsetkishi – 0,9 paıyz (ótken jyly osy merzimde – 1 957 bas, 1 paıyz).
Onyń aıtýynsha, sondaı-aq zerttelgen 76 myń bas usaq maldyń 109-ynan brýtsellez (0,1 paıyz) tabyldy.
-Barlyq sanıtarlyq maldar soıýǵa ýaqtyly tapsyrylyp otyr. 2022 jylǵa oblys boıynsha aýrý janýarlardy sanıtarııalyq soıýdy uıymdastyrý qyzmetine 32,9 mln teńge qarjy qarastyryldy. Aqpan aıynda basqarma men aýdandyq veterınarlyq stantsııalar arasynda memlekettik satyp alý kelisim-sharttary rásimdeldi, - deıdi basqarma basshysy.
S.Nurmaǵanbetovtiń sózine qaraǵanda, epızootııaǵa qarsy veterınarlyq is-sharalar aıasynda asa qaýipti aýrýlardyń aldyn alý úshin mal egý isi turaqty uıymdastyrylyp keledi. Mysaly, qazirgi kezde túınemege qarsy 291 myń bas iri qarany, 150,8 myń bas usaq maldy vaktsınatsııalaý jumysy júrgizilýde.
Jyl basynan beri janýarlardyń asa qaýipti juqpaly aýrýlarynyń 8 oshaǵy (bireýi – qarasan, jeteýi – ınfektsııalyq rınotraheıt) tirkeldi. Munyń ótken jyldardaǵy osy kezeńmen (2020 jyly – 62 oshaq, 2021 jyly – 11) salystyrǵanda, azaıyp kele jatqany baıqalady.
Basqarma basshysynyń málimdeýinshe, oblys aýmaǵynda veterınarlyq qaýipsizdikti qamtamasyz etý maqsatynda veterınarııa salasyna 2021 jyly 1 mlrd 363 mln, bıyl 1 mlrd 371 mln teńge bólindi.
Memleket basshysynyń 2021 jylǵy 1 qyrkúıektegi «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń aıasynda veterınarııa qyzmetkerleriniń eńbekaqysyn arttyrý kózdelgen. Osyǵan oraı Qazaqstan Respýblıkasy Úkimetiniń 2015 jylǵy 31 jeltoqsandaǵy № 1193 qaýlysyna ózgerister engizilip, bıylǵy 1 qańtardan bastap veterınarııalyq stantsııadaǵy veterınar mamandardyń eńbekaqysy ortasha eseppen 23 paıyzǵa ósti.
«Oblysta 12 aýdan men Oral qalasynda barlyǵy 13 veterınarlyq stantsııa bolsa, qazirgi kezde 39 oryn bos tur. Bul veterınarlyq dárigerler jetispeıdi degen sóz emes. Jyl saıyn Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń veterınarııa fakýltetinen mamandar oqyp shyǵyp jatyr. Alaıda jastar aýylǵa barǵysy kelmeıdi», dedi S.Nurmaǵanbetov.
Eske sala keteıik, budan buryn BQO-da qańǵybas ıt-mysyqty bıozararsyzdandyrýǵa 65,5 mln teńge bólingenin jazǵan bolatynbyz.
