BQO-da 2 myńnan asa turǵyn úıi aýyz sýsyz qalǵan aýylda tótenshe jaǵdaı jarııalandy
Bul týraly «Ashyq» NQA portalynda jarııalanǵan eldi meken basshysynyń sheshim qujatynda jazylǵan, dep habarlaıdy QazAqparat tilshisi.
«8 naýryz kúni Batys Qazaqstan oblysy, Aqjaıyq aýdany Chapaev aýylynyń ortalyqtandyrylǵan sýmen qamtý júıesi uńǵymalaryndaǵy 3 sý sorǵyshtyń bireýi isten shyqty. Qalǵan qurylǵylar sý qysymyn qajetti deńgeıde jetkize almaǵandyqtan, qazirgi tańda 2 099 turǵyn úı, 41 áleýmettik nysan sýsyz qaldy. Óıtkeni, qalǵan eki sý sorǵyshtyń tozýy 60%-ǵa jetken. Qazirgi tańda sýdy kestemen berý múmkindigi qarastyrylyp, kestege sáıkes, saǵat 07:00-09:00, 12:00-14:00, 17:00-22:00 aralyǵynda berilýde. Qalyptasqan jaǵdaıdyń saldaryn shuǵyl joıý jáne áleýmettik shıelenistiń aldyn alý maqsatynda tótenshe jaǵdaı jarııalaý qajettiligi týyndap otyr», - dep atalǵan sheshimge túsindirme berilgen.
Eske salaıyq, taıaýda aýyz sý men jylýsyz qalǵan Batys Qazaqstan oblysy, Terekti aýdanynyń Terekti aýyldyq okrýginde tótenshe jaǵdaı jarııalanǵan edi.