BQO-da 2 myńnan asa turǵyn úıdiń teń jartysynan kóbi jóndeýdi qajet etedi

ORAL. KAZINFORM — Batys Qazaqstan oblysynda qazirgi kezde 29 136 adam turǵyn úı kezeginde tur.

а
Фото: Валерий Бугаев

BQO energetıka, turǵyn úı-kommýnaldyq sharýashylyq basqarmasy basshysynyń mindetin atqarýshy Beıimbet Mýsınniń málim etkenindeı, bıylǵy jeti aıdyń qorytyndysy boıynsha kezekte turǵan 625 adam pátermen qamtamasyz etildi. 

Onyń sózine qaraǵanda, turǵyndarǵa 2025 jyly turǵyn úı sertıfıkatyn berýge 240 mln teńge qarastyrylǵan. Kúni búginge deıin 163 mln teńgege 145 sertıfıkat berildi. Sonymen qatar halyqtyń áleýmettik jaǵynan az qamtylǵan otbasylaryna jeke turǵyn úıden jalǵa alynǵan úıler úshin 50 mln teńge bólindi. Qazirgi tańda turǵyndar men «Otbasy bank» AQ arasynda 13,5 mln teńgege kelisim jasaldy.

Oǵan qosa «Qaladan aýylǵa» baǵdarlamasy aıasynda 2025 jyly 8 úı (Bórli aýdanynda — 4, Kaztalovta — 4) satyp alynyp, qaladan aýylǵa kóshken turǵyndar qonystandy.

— Oblysta barlyǵy 2 416 kópqabatty turǵyn úı bolsa, sonyń 52,7 paıyzy jóndeýdi qajet etedi. Qujattary daıyn 12 joba jergilikti bıýdjetten qarjylandyrylmaqshy. Sol sekildi jergilikti qazynadan 16 lıftini aýystyrýǵa 323 mln teńge qaraldy. Nátıjesinde Oralda 11, Aqsaı qalasynda 5 lıft jańartylyp jatyr, — dedi B.Mýsın.

Onyń sózine qaraǵanda, 2024 jyly 879 mln teńgege 26 joba júzege asyryldy. Sonyń ishinde 19 úıdiń shatyry kúrdeli jóndeýden ótkizildi. 4 úı kúrdeli jóndelse, lıftilerdi aýystyrý boıynsha 3 joba máresine jetti.

Eske sala keteıik, budan buryn Batys Qazaqstanda qandaı jylý nysandary jańartylyp jatqanyn jazǵan edik. 

Сейчас читают