BQO-da 2 avtokólikten birneshe myltyq pen eliktiń eti tabyldy

ORAL. QazAqparat – Batys Qazaqstan oblysynda 2 avtokólikten birneshe myltyq pen eliktiń eti tabyldy, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkenindeı, oqıǵa Bórli-Aqsaı-Jympıty avtojolynda boldy.

«Atalmysh jol boıynda toqtatylǵan BMW jáne Toyota Land Cruser GXR avtokólikterinen MTs-21-12 tegis uńǵyly ańshy myltyǵy, oq-dárisimen MR-153 markaly ańshy karabıni, «Tıgr» karabıni, 37 usaq kalıbrli oq-dári jáne eliktiń eti salynǵan paketter tabylyp, tárkilendi. Qarýǵa tıisti qujattar bar. Osy derek boıynsha QR QK 337-baby 1-bóligine (zańsyz ań aýlaý) sáıkes sotqa deıingi tergeý amaldary júrgizilýde. Bul bap boıynsha aıypty dep tanylǵan adam múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp, úsh myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna, ne segiz júz saǵatqa deıingi merzimge qoǵamdyq jumystarǵa tartýǵa, ne úsh jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýǵa jazalanady», dep habarlady vedomstvodan.

Eske sala keteıik, budan buryn BQO-da 57 mln teńgeniń temekisi men qoldan jasalǵan ishimdikti zańsyz satqan turǵynnyń ustalǵanyn jazǵan bolatynbyz.