BQO-da 2,5 myńnan astam kıik múıizi tárkilendi

ORAL. QazAqparat – Batys Qazaqstan oblysynda «Kıik» jedel aldyn alý sharalary bastaldy, dep habarlaıdy QazAqparat tilshisi.

BQO polıtsııa departamentiniń baspasóz qyzmeti málim etkenindeı, 1-31 jeltoqsan aralyǵynda ótkiziletin shara maqsaty – kıikterge qatysty brakonerlik derekterdi anyqtaý jáne olardyń aldyn alý, kıik múıizderiniń zańsyz aınalymyna tosqaýyl qoıý.

Jyl basynan beri óńirde 37 qylmystyq is tirkelse, sonyń altaýy zańsyz aýlaý, 31-i sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan ósimdikter men janýarlar túrlerin, olardyń bólikterin nemese derıvattaryn zańsyz qoldanǵany úshin qozǵaldy.

Qylmystyq isterdi sotta qaraý barysynda 8 adam qylmystyq jaýapkershilikke tartyldy, olardyń jekelegeni bas bostandyǵynan aıyrý oryndarynda jazasyn óteýde.

Quqyq buzýshylardan 2,5 myńnan astam múıiz tárkilenip, 480-nen astam atylǵan kıik ushasy tabyldy.

Eske sala keteıik, budan buryn BQO-da zańsyz kıik aýlaýmen aınalysqan eki qylmystyq toptyń ustalǵanyn jazǵan bolatynbyz.