BQO-da 180 basshy áıel jumys isteıdi
ORAL. QazAqparat - Batys Qazaqstan oblysynda 180 basshy áıel jumys jasaıdy, dep habarlaıdy QazAqparat.
Oblys ákimi Altaı Kólginov ardager analardy, ár salada jemisti qyzmet atqaryp júrgen áıelderdi merekesimen quttyqtap, izgi tilegin jetkizdi. Altaı Kólginov Memleket basshysynyń Parlamenttiń birlesken otyrysynda bes áleýmettik bastama kótergenin, ony halyqtyń qoldap otyrǵanyn aıtyp, osynaý kókeıkesti máselelerdi sheshýge memleket pen qoǵam ómirine belsene aralasyp júrgen áıelderdiń qomaqty úles qosa alatynyn atap ótti.
Óńirde jyl sanap atqarýshy, ókildi jáne sot organdarynda qyzmet atqaratyn áıelder sany artyp keledi. BQO-dan bir áıel Májilis depýtaty bolyp saılansa, taǵy biri QR Esep komıtetiniń tóraıymy qyzmetin atqarýda.
Sondaı-aq, 1 oblys, 4 aýdan ákiminiń orynbasary, 15 aýyldyq okrýgter ákimderi men olardyń orynbasarlary, 50 oblystyq basqarmalar, qalalyq jáne aýdandyq bólimder basshylary, 54 jergilikti máslıhat depýtattary - áıelder. Sot júıesinde 100 áıel bolsa, sonyń 54-i - sýdıalar. 17 myńnan astamy bilim, 8,5 myńnan astamy densaýlyq saqtaý salasynda jumys jasaıdy. Qorǵanys salasynda 127 áıel bolsa, sonyń 8-i - áskerı qyzmetkerler. Oblysta 48 myń shaǵyn kásipkerlik nysany bolsa, sonyń 19 myńyna áıelder basshylyq etedi. «Altyn alqa» jáne «Kúmis alqa» ataǵyn alǵan ardaqty analar da barshylyq.
Jıynda aqyndar Aqushtap Baqtygereeva, Darıǵa Mushtanova, Jansaıa Mýsına, eńbek ardageri Roza Kójekova, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi komıssııa tóraıymynyń orynbasary Elena Tarasenko jáne basqalar rııasyz tilekterin bildirdi.
Sondaı-aq, H.Bókeeva atyndaǵy oblystyq qazaq drama teatrynda «Mıllıon raýshan gúl» atty merekelik kontsert qoıylyp, shara aldynda «Aqjaıyqtyń asyl arýlary» atty jınaqtyń ekinshi basylymy tanystyryldy.
