BQO-da 177 mektepte 440-tan astam oqýshy JRVI-men aýyrǵan
ORAL. KAZINFORM — Batys Qazaqstan oblysynda 1 qazannan beri 24 291 adamnyń jedel respıratorlyq vırýstyq ınfektsııalardy (JRVI) juqtyrǵany belgili boldy.
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkenindeı, olardyń 16 683-i – 14 jasqa deıingi balalar. Sonyń ishinde 303-i 1 jasqa tolmaǵan. 34 júkti áıel de aýyrǵan.
Nurlybek Ermekulynyń sózine qaraǵanda, oblystyń 177 mektebinde 441 oqýshy JRVI-men syrqattanǵan. Bilim ordalary jabylmaǵanymen, kúndelikti monıtorıng jumystary júrgizilip jatyr.
- 1 qazannan beri 24 adamnyń tumaýdyń A tıpiniń H3N2 túrine shaldyqqany tirkeldi. Bulardyń ishinde 8-i – 4 jasqa deıingiler, 10-y – 5-14 jas aralyǵyndaǵy balalar, qalǵan altaýy – eresekter. Tumaý tárizdes vırýstardan rınovırýs (35), bokavırýs (12), adenovırýs (9), paragrıpp (7), pandemııalyq emes koronavırýs (7) jáne RS – vırýs (1) anyqtaldy, - dedi N.Mustaev.
Maman jedel respıratorlyq vırýstyq ınfektsııalardyń taralýyna jol bermeý úshin ózdiginen emdelmeý kerektigin eske saldy. JRVI-dyń alǵashqy belgileri paıda bolǵan kezde (qyzba, bas aýrýy, álsizdik) mindetti túrde turǵylyqty jerdegi medıtsınalyq mekemege habarlasyp, dárigerdiń barlyq usynysyn oryndaý qajet.
- Aýrý belgileri bar, túshkiretin nemese jóteletin adamdarmen jaqyn qarym-qatynastan aýlaq bolý kerek. Oǵan qosa bólmeni únemi jeldetip, taza ustaǵan jón. Salaýatty ómir saltyn ustanyp, jetkilikti uıyqtap, durys tamaqtaný, sonymen qatar dene shynyqtyrýmen aınalysý mańyzdy, - dep qosty departament basshysynyń orynbasary.
Eske sala keteıik, budan buryn Batys Qazaqstanda 16 myńǵa jýyq adamnyń JRVI-men syrqattanǵanyn jazǵan edik.
Sondaı-aq Batys Qazaqstanda kókjótelmen aýyrǵan 18 balanyń deni ekpe almaǵan.