BQO-da 17 jastaǵy qyzdy óltirgen kúdikti eki aıǵa qamaýǵa alyndy
ORAL. QazAqparat - Zelenov aýdanynda 17 jasar qyzdy óltirgen kúdikti eki aıǵa qamaýǵa alyndy, dep habarlaıdy QazAqparat tilshisi.
Zelenov aýdandyq №2 soty búgin Ashat Temirbaevty eki aıǵa qamaýǵa alý túrindegi bultartpaý sharasyn sanktsııalady.
BQO ishki ister departamentiniń baspasóz qyzmetinen túsken málimetke qaraǵanda, 28 shilde kúni shamamen saǵat 10.00-de Zelenov aýdany Darııan aýylynda butalardyń arasynan zorlyqpen óltirilgen qyzdyń denesi tabylǵan.
Osy qylmysqa kúdikti retinde 1998 jyly týǵan A.Temirbaev ustalyp, Oral qalalyq ishki ister basqarmasynyń ýaqytsha oqshaýlaý ızolıatoryna qamalǵan bolatyn.
Qazirgi kezde atalǵan derek boıynsha QR QK 99-baby 1-bóligine sáıkes (kisi óltirý) tergeý amaldary júrgizilýde.
Aýyl turǵyndarynyń aıtýynsha, Dana Óteǵalıeva bıyl mektepti jaqsy bitirip, reseılik ýnıversıtetke oqýǵa túsken. Sonymen qatar, ol karate, sambomen aınalysqan. Bıyl kóktemde Dana áskerden kelgen Ashat Temirbaevpen tanysyp, kezdesip júrgen. Áıtse de, kóp uzamaı baılanysyn úzgen. Osyǵan oraı, kek saqtaǵan kúdikti 28 shildege qaraǵan túni qyzdy úıinen shaqyryp alyp, óltirip ketken.
Eske sala keteıik, budan buryn 17 jasar qyzdy óltirgen kúdiktiniń ustalǵanyn jazǵan bolatynbyz.
