BQO-da 17 jastaǵy stýdent esirtki taratýmen aınalysqan

ORAL. KAZINFORM — «Tsıfrlyq satý» jedel aldyn alý is-sharasy barysynda BQO PD esirtki qylmysyna qarsy is-qımyl basqarmasynyń qyzmetkerleri tyıym salynǵan zattardy taratýǵa qatysy bar dep kúdikke ilingen 17 jastaǵy óńir turǵynyn ustady.

BQO polıtsııa departamentiniń baspasóz qyzmetinen málim etkenindeı, jeke tintý kezinde kúdiktiniń qaltasynan ızolentamen oralǵan 22 túıinshek tabylyp, tárkilendi. Olardyń ishinde erekshe ıisi bar aq tústi untaq tárizdi zat bolǵan. 

Stýdenttiń sózine qaraǵanda, ol eki aı boıy esirtkini zańsyz ótkizýmen aınalysatyn ınternet-dúkenderdiń birinde kýrer bolyp jumys istegen.

— Qazirgi ýaqytta onyń quqyqqa qaıshy qyzmetke qalaı tartylǵany jáne qylmystyq shemany uıymdastyrýǵa qatysy bar azamattar anyqtalýda. Atalǵan derek boıynsha qylmystyq is qozǵaldy. Tergeý amaldary júrgizilýde, — dep habarlady vedomstvodan.

Eske sala keteıik, budan buryn Batys Qazaqstanda 258 kg astam esirtki zańsyz aınalymnan alynǵanyn jazǵan bolatynbyz.