BQO-da 17 soǵys sarbazynyń súıegi tabylyp, týystary izdestirilip jatyr
ORAL. QazAqparat – BQO-nyń Bókeı ordasy aýdanynda Ekinshi dúnıejúzilik soǵys kezinde qaza tapqan 17 sarbazdyń súıegi tabyldy, dep habarlaıdy QazAqparat tilshisi.
Tasqala aýdany Mereı aýylynda turatyn M. Mámetova atyndaǵy izdestirý jasaǵynyń komandıri Sergeı Lapshın málim etkendeı, atalmysh aýdanda bıyl da izdestirý jumystary júrgizildi.
Sonyń nátıjesinde izdestirý toby soǵys kezinde jaý bombasynan mert bolǵan 17 jaýyngerdiń súıegin qazyp shyǵardy.
S. Lapshınniń sózine qaraǵanda, bulardyń bári de 93-artıllerııa dıvızıonynyń jaýyngerleri bolýy kerek. Olar Stalıngrad maıdanyna bara jatqan kezde bombalaýǵa tap bolyp, qaza tapqan sekildi. Súıekten ózge qasyq, ýly gazǵa qarsy qoldanylatyn tumsha shyqty.
«Qazirgi tańda osy sarbazdardyń týma-týystary izdestirilýde. Ótken jyly 15 jaýyngerdiń súıegi tabylyp, Bókeı ordasy aýdany ortalyǵy Saıqyn aýylynda qaıta jerlengen bolatyn. Bıyl solardyń biri - Vlas Golovkonyń týysy Vıktorııa Lısnıak Ýkraınadan habarlasty. Vlas Golovko onyń anasy Zınaıda Kýrılonyń aǵasy eken. Sondyqtan jaqyny jerlengen jerden bir ýys topyraq berip jiberýdi ótindi. Kúni búgin osy máselemen aınalysýdamyn», dedi QazAqparat tilshisine S.Lapshın.
Ekinshi dúnıejúzilik soǵys kezinde Stalıngrad maıdanyna tıip turǵandyqtan, BQO-nyń Orda (qazirgi Bókeı ordasy), Jánibek aýdandary soǵys jaǵdaıynda dep jarııalanǵany belgili. Jaý ushaqtary osy aýdandar aýmaǵyn, ásirese, temirjol boıyn jıi bombalap, sonyń saldarynan jaýyngerlermen qatar turǵyndar da qaza tapqan edi. Soǵystyń aıaqtalǵanyna 75 jyl ótse de, shaıqas izderi áli saırap jatyr.
Eskesala keteıik, budan buryn BQO-da soǵys kezinde qaza tapqan 15 jaýyngerdiń súıegi qaıta jerlengenin jazǵan bolatynbyz.
