BQO-da 17 adamdy aldaǵan qylmystyq top quryqtaldy
ORAL. KAZINFORM – Batys Qazaqstan oblysynda ózin jábirlenýshilerdiń balasy retinde kórsetip, alaıaqtyqpen aınalysqan qylmystyq top ustaldy.
BQO polıtsııa departamentiniń baspasóz qyzmetinen málim etkenindeı, atalǵan top úsh jigitten quralǵan.
Qaratóbe aýdany polıtsııa bóliminiń qyzmetkerleri kúdiktilerdiń biri WhatsApp qosymshasy arqyly pedagogterdiń is-sharasyn ótkizý úshin qurylǵan jalpy chatqa kirgenin anyqtady. Chattyń mazmuny men hattardy zerttegennen keıin ol ondaǵy adamdardan aqsha aýdarýdy surap, jekelerine shyqqan.
«Bul rette kúdikti jábirlenýshilerge ózin solardyń balasy sııaqty tanystyryp, óziniń telefony sónip qalǵanyn jetkizgen. Kúdiktilerdiń sózine senip, jábirlenýshiler karta derekteri men CVV-kodtaryn jibergen. Sodan keıin alaıaqtar qarajatty qolma-qol aqshaǵa almastyrǵan. Qazirgi ýaqytta alaıaqtyqtyń 17 faktisi boıynsha polıtsııa tergeý júrgizip jatyr. Aldanǵandar arasynda basqa óńirdiń turǵyndary da bar ekeni anyqtaldy. Keltirilgen zalaldyń jalpy somasy – shamamen 10 mıllıon teńge. Polıtsııa azamattardan bógde adamdarmen telefonmen sóılesý kezinde ǵana emes, jalpy chattarda hat almasý kezinde de abaı bolý kerektigin eske salady», dep habarlady vedomstvodan.
Eske sala keteıik, budan buryn Oralda stýdentterdi qorqytyp, nesıe rásimdetken 3 kúdiktiniń ustalǵanyn jazǵan edik.
