BQO-da 15500 medıtsına qyzmetkerine 3,6 mlrd teńge ústemeaqy tólendi
ORAL. QazAqparat – Batys Qazaqstan oblysynda 2020 jyly koronavırýsqa qarsy kúres sharalaryna tartylǵan 15542 medıtsına qyzmetkerine 3,6 mlrd teńge ústemeaqy tólendi, dep habarlaıdy QazAqparat tilshisi.
«Áleýmettik medıtsınalyq saqtandyrý qory» KEAQ BQO boıynsha fılıalynyń dırektory Nurjamal Jumaǵulovanyń óńirlik kommýnıkatsııalar qyzmeti alańynda ótken brıfıngide málim etkenindeı, kovıdten emdeý úshin ambýlatorııalyq-dárilik qamtamasyz etýge 5 preparat engizildi.
Atalǵan dári-dármekpen ótken jyly 47,7 mln teńgege 19768 patsıent qamtyldy.
Nurjamal Shamǵonqyzynyń sózine qaraǵanda, koronavırýsqa shaldyqqan 17328 naýqas 2,1 mlrd teńgege em aldy.
Barlyǵy 50087 PTR-dıagnostıkaǵa 489 mln teńge tólendi. 19054 mobıldi brıgadanyń shyqqany úshin 116 mln teńge jumsaldy.
Barlyq qarjy negizinen indetpen kúreske baǵyttalǵanymen, medıtsınalyq qyzmet kórsetý, ońaltý jumystary da jalǵasyn tapty.
Mysaly, 2965 emdelýshi mindetti áleýmettik medıtsınalyq saqtandyrý aıasynda táýlik boıy statsıonarlarda 608,9 mln teńgeniń medıtsınalyq ońaltý qyzmetin aldy.
Josparly túrde statsıonarlarda 70631 patsıent 7,49 mlrd teńgege emdeldi, 11,8 myń adam bosansa (1,22 mlrd teńge), 3,4 mlrd teńgege 15,4 myń ota jasaldy.
«Mindetti áleýmettik medıtsınalyq saqtandyrý júıesin iske qosýdaǵy ózekti máseleniń biri – azamattardy saqtandyrý. «Saqtandyrý» bazasynyń derekteri boıynsha bıylǵy 1 naýryzda oblysta saqtandyrylǵan halyqtyń sany 84,2 paıyz bolsa, saqtandyrylmaǵandardyń úles sany 15,8 paıyz nemese 108491 adamdy qurap otyr. Ótken jyldyń shilde aıynda saqtandyrylmaǵandardyń úles sany 22,4 paıyz bolǵan edi. Bul jergilikti atqarýshy organdarmen birlese júrgizilip jatqan jumystardyń oń nátıje berip otyrǵanyn kórsetedi», dedi N.Jumaǵulova.
Eske sala keteıik, budan buryn BQO-da naýryzda koronavırýsqa qarsy 1200-den astam adamnyń egilgenin jazǵan bolatynbyz.
