BQO-da 150-ge jýyq qatty turmystyq qaldyqtar polıgonynyń tek 17-sine ruqsat berilgen

ORAL. KAZINFORM — Batys Qazaqstan oblysy aýmaǵynda qatty turmystyq qaldyqtar ornalastyrylatyn 147 polıgon bar. 

BQO boıynsha ekologııa departamenti basshysynyń orynbasary Syrym Tilegenovtiń málim etkenindeı, sonyń tek 17-siniń ekologııalyq ruqsaty bar.

Syrym Baqtyǵalıulynyń sózine qaraǵanda, qalǵan 130 nysan boıynsha ruqsat qujattaryn resimdeý oryndalý satysynda. Qazirgi ýaqytta atalǵan maqsat úshin jer bólý týraly jergilikti atqarýshy organdardyń sheshimderi ǵana bar. 

— Oral qalasynda polıgon 1975 jyly, Aqsaıda 1986 jyly paıdalanýǵa berilgen. Bul polıgondar boıynsha jobalyq qujattama joǵalǵan. Jobalyq paıdalaný merzimi aıaqtalǵanyna qaramastan, qaldyqtardy ornalastyrýǵa jáne kómýge múmkindik bolǵannan keıin polıgon áli paıdalanylyp otyr. Oral men Aqsaıda jańadan qatty turmystyq qaldyqtar polıgonyn salý úshin jobalaý aldyndaǵy jumys oryndalyp, tehnıkalyq ekonomıkalyq negizdeme daıyndaldy, — dedi Syrym Tilegenov.

Onyń málimdeýinshe, basqarýshy kásiporyn qatty turmystyq qaldyqtardy ornalastyrý tehnologııasyn kóbine saqtamaıdy. Atap aıtqanda, bólip jınaıtyn kartalary, qaldyqtardy kómý kezinde jabatyn topyraq alý úshin óziniń kareri joq. Qaldyqtardyń janýyna jol beriledi.

Qaldyqtardy suryptaý, baǵaly komponentterdi irikteý jumysy tolyqtaı júrgizilmeıdi.

Ekologııalyq kodekstiń 350-baby 16-tarmaǵyna sáıkes rekýltıvatsııa (topyraq qunarlylyǵyn qalpyna keltirý) qorynsyz polıgondy paıdalanýǵa tyıym salynǵan. Soǵan qaramastan, atalǵan eki polıgon boıynsha mundaı qor qurylmaǵan. 

— Aýdandarda aýyldyq jerlerde polıgondardy kúl-qoqys oryndary dep ataıdy. Bul nysandardy salý boıynsha jobalyq qujattama eshqashan bolǵan emes. Olardyń kóbiniń aınalasy qorshalmaǵan, tómpelenbegen, kómý tehnologııasy saqtalmaıdy, qabattap jabatyn topyraq karerleri joq, rekýltıvatsııa qorlary qurylmaǵan, — deıdi departament basshysynyń orynbasary.

Onyń aıtýynsha, sońǵy eki jylda Oral men Aqsaı qalalarynda polıgondarda qaldyqtardyń birneshe ret órtenýi tirkeldi. Munyń basty sebepteri — kómý tehnologııasynyń saqtalmaýy, polıgondardy qorǵaý rejımi (bógde adamdardyń kirýi) men qoqysty tıisti suryptaýdyń bolmaýy.

Osy nysandardy paıdalanatyn aýdandardyń kommýnaldyq qyzmetteriniń qaldyqtardy ornalastyrýǵa qajetti materıaldyq-tehnıkalyq bazasy joq. Ekonomıkalyq jaǵynan tıimsiz bolǵandyqtan, kásipkerler buǵan qyzyǵýshylyq tanytpaıdy. Saldarynan bul nysandardyń kóbi ıesiz. 

— Sondaı-aq BQO-nyń ekologııalyq máselelerin keshendi sheshý jónindegi jol kartasynyń 8-tarmaǵynda Oral jáne Aqsaı qalalarynda jańa qatty turmystyq qaldyqtar polıgonyn salý, eskilerin rekýltıvatsııalaý boıynsha is-sharany 2022 jylǵy jeltoqsanǵa deıin oryndaý kózdelgenimen, bul jumystar kúni búginge deıin júrgizilgen joq, — dedi Syrym Tilegenov.

Eske sala keteıik, budan buryn BQO-da qorshaǵan ortaǵa eleýli túrde jaǵymsyz áser etetin 24 kásiporyn tirkelgenin jazǵan bolatynbyz.