BQO-da 150-ge jýyq kásipkerlik nysany saýda ústemesin asyryp jibergen
ORAL. KAZINFORM — Batys Qazaqstan oblysynda jyl basynan beri zańnamada belgilengen 15 paıyz ústemeaqy mólsherin asyrǵan bıznes sýbektilerine qatysty shara qoldanyldy.
BQO boıynsha saýda jáne tutynýshylardyń quqyqtaryn qorǵaý departamentiniń basshysy Elmıra Qımatovanyń málim etkenindeı, áleýmettik mańyzy bar azyq-túlik taýarlaryn satý kezinde saýda ústemesiniń mólsherin saqtaý qajet.
Elmıra Nurqyzynyń sózine qaraǵanda, jyl basynan beri QR Ákimshilik quqyq buzýshylyq týraly kodeksiniń 204-4-babyna sáıkes 147 kásipkerlik nysany jaýapqa tartyldy. Olarǵa 2 mln 249 myń teńge kóleminde ákimshilik aıyppul salyndy.
— Ákimshilik jaýapkershilikke tartylǵandardyń 95-i — shaǵyn bıznes nysandary (úı janyndaǵy dúkender), 46-sy — kóterme saýda kompanııalary, altaýy — saýda jelileri. Atalǵan sýbektiler kókónis (kartop, pııaz, qyryqqabat, sábiz), S1 sanatyndaǵy jumyrtqa, qaraqumyq jarmasy, qant, tuz jáne basqa áleýmettik mańyzy bar azyq-túlik taýarlaryn satý kezinde saýda ústemesin asyrý faktilerine jol bergen, — deıdi Elmıra Qımatova.
Onyń aıtýynsha, saýda obektileriniń taýar baǵasyn tengemen kórsetpeı satýy jáne vıtrınada kórsetilgen taýar baǵasynyń kassada soǵylǵan baǵaǵa sáıkes kelmeýi faktileri boıynsha atalǵan kodekstiń 193-babyna sáıkes is qozǵalady. Osy bapqa sáıkes 16 kásipkerlik sýbektisi ákimshilik jaýapkershilikke tartylyp, 730 myń 925 teńge somasynda aıyppul salyndy.
Eske salaıyq, budan buryn Batys Qazaqstanda tutynýshylarǵa 35,5 mln teńge keri qaıtarylǵanyn jazǵanbyz.
