BQO-da 15 maýsymnan bastap qandaı shekteý sharalary engiziledi
BQO taýarlar men kórsetiletin qyzmetterdiń sapasy men qaýipsizdigin baqylaý departamentinen túsken málimetke qaraǵanda, oblystyń bas memlekettik sanıtar dárigeriniń jańa qaýlysyna sáıkes karantın 15 maýsymnan bastap alynǵanymen, endi tek shekteý sharalary qoldanylady.
Atap aıtqanda, banketter, úılený toılary, mereıtoılar, otbasylyq, estelik, ádet-ǵuryp jáne ózge de adamdar kóp jınalatyn is-sharalar ótkizýge tyıym salynady.
Barlyq mektepke deıingi balalar uıymdarynda tek kezekshi toptardyń jumysyna ruqsat beriledi. Sondaı-aq qalalyq demalys parki, oıyn-saýyq nysandary, kınoteatrlar, barlyq túrdegi oıyn alańdary (aýlalardaǵyny qospaǵanda), túngi klýbtar, kompıýterlik jáne oıyn klýbtary, kalıandyq, býkmeker keńseleri, balalardyń saýyqtyrý jáne mektep janyndaǵy lagerleri, keıterıngtik qyzmetter kórsetý jáne merekelerdi uıymdastyrý qyzmetteri, dinı nysandar qyzmeti toqtata turylady.
Sol sekildi menshik nysanyna qaramastan, barlyq uıymdar men kásiporyndar sanıtarlyq-epıdemıologııalyq tártiptiń saqtalýyn qamtamasyz etýi tıis:
-personal men qyzmetkerlerdi jeke qorǵanys quraldarymen (betperde, qolǵappen) qamtamasyz etý;
-úı-jaılardyń, ǵımarattardyń kiretin jáne shyǵatyn jerlerinde sanıtaızerler ornatý;
-kelýshilerdi, klıentterdi úı-jaılarǵa betperdesiz jibermeý;
-úı-jaıdyń ishinde jáne syrtynda adamdar arasynda keminde 2 metr áleýmettik qashyqtyqtyń saqtalýyn baqylaý;
-úı-jaı ishindegi adam sany boıynsha shekteý qoıý - 20 sharshy metrge 1 adamnan artyq emes;
-úı-jaı ishinde kezekte 5 adamǵa deıingi shekteýdiń saqtalýyn baqylaý;
-úı-jaılardy ylǵaldy jınaý jáne dezınfektsııalaý kúnine 2 retten kem emes;
-kelýshilerdiń jaı-kúıine turaqty monıtorıng júrgizý úshin barlyq nysandardyń kire berisinde qashyqtyq termometrııany (qol teplovızoryn) júrgizý;
-júrgizilgen/alynǵan qyzmetter úshin qolma-qol aqshasyz esep aıyrysý (kartalar, telefondaǵy qosymsha) úshin jaǵdaıdy barynsha qamtamasyz etý.
Jumys ýaqyty men rejımi boıynsha 15 maýsymnan bastap mynadaı shekteýler engiziledi:
-jınalys, keńesterdi, semınar, konferentsııalardy selektorlyq rejımde jáne beınebaılanyspen ótkizý arqyly memlekettik organdar men kvazımemlekettik sektor uıymdary qyzmetkerleriniń 80 paıyzyn qashyqtan jumys jasaý tásiline aýystyrý;
-HQO onlaın rejıminde qyzmet kórsetýge ótý, onlaın rejımde kórsetilýi múmkin emes qyzmetterdi aldyn ala jazý boıynsha júzege asyrý (saǵat 10.00-den 18.00-ge deıin);
-medıtsınalyq ortalyqtar (aldyn ala jazylý boıynsha) saǵat 10.00-den 18.00-ge deıin;
-stomatologııalyq klınıkalar (aldyn ala jazylý boıynsha) saǵat 10.00-den 18.00-ge deıin;
-azyq-túlik bazarlary men azyq-túlik emes bazarlar saýda sóreleri arasyndaǵy qashyqtyqty saqtaı otyryp, azyq-túlik ónimderin satý tek ólshep-oralǵan túrde, kókónis pen jemisterdi qospaǵanda, saǵat 10.00-den 16.00-ge deıin júrgizilýi tıis;
-azyq-túlik dúkenderi (azyq-túlik ónimderin satý, kókónister men jemisterdi qospaǵanda, tek ólshep-oralǵan túrde júrgizilýi tıis) saǵat 09.00-den 22.00-ge deıin;
-meıramhanalar/barlar/dámhanalar/ashanalar jáne basqalary (bir ýaqytta 30 adamnan aspaıtyn kelýshiler sanymen), qoǵamdyq tamaqtaný nysandarynda kalıandardy paıdalanýǵa tyıym salynady, ústelderdiń arasyndaǵy qashyqtyqty 2 metrden kem emes saqtaýdy qamtamasyz etý, bir ústelge otyrǵyzý 4 adamnan aspaýy tıis, saǵat 10.00-den 22.00-ge deıin;
-aýdany 2000 sharshy metrge deıingi azyq-túlik emes dúkender (barlyq baǵyttar), saǵat 10.00-den 18.00-ge deıin;
-aýdany 2000 sharshy metrden asatyn saýda nysandary (saýda ortalyqtary, saýda úıleri) saǵat 10.00-den 20.00-ge deıin, saýda nysandarynyń aýmaǵynda ornalasqan kınoteatrlar, balalar jáne basqa da oıyn-saýyq ortalyqtarynyń, qoǵamdyq tamaqtandyrý nysandarynyń (ashanalar, fýd-kordtar jáne basqalar) qyzmetin qospaǵanda;
-banktik qyzmetter, saǵat 09.00-den 18.00-ge deıin;
-qonaqúıler, kazarmalyq rejımge jáne karantındegi naýqastardy ornalastyrýǵa arnalǵandardy qospaǵanda;
-medıtsınalyq-áleýmettik mekemeler saǵat 09.00-den 16.00-ge deıin;
-túzetý kabınetteri (aldyn ala jazylý boıynsha) saǵat 09.00-den 16.00-ge deıin;
-shashtarazdar, sulýlyq salondary barlyq qyzmet túrleri (aldyn ala jazylý boıynsha), saǵat 10.00-den 18.00-ge deıin;
-mektepke deıingi balalar uıymdarynyń kezekshi toptary (birikken bóbekjaı jáne 1-shi kishi, 2-shi kishi, orta, biriktirilgen úlken jáne mektepke deıingi toptar, biraq ár jas tobynda 15 baladan artyq emes), jatyn bólmelerde 1 metrden kem emes qashyqtyqty saqtaý. Balabaqshanyń medıtsınalyq qyzmetkeri barlyq qyzmetkerler men balalardy kúndelikti tańerteńgilik fıltrden ótkizýi tıis. Ýchaskelik pedıatrdan densaýlyq jaǵdaıy týraly anyqtamalary (3 jumys kúninen artyq bolmaǵan jaǵdaıda) bar balalardy qabyldaý. Jiti respıratorlyq juqpalar (joǵary temperatýra, jótel, tumaý) jáne basqa da juqpaly aýrýlar belgileri bar balalar men qyzmetkerlerdi jumysqa jibermeý;
-bilim berý ortalyqtary, úıirmeler, balalar damý ortalyqtary (10 adamnan kóp emes), saǵat 09.00-den 16.00-ge deıin;
-sporttyq nysandar (tek ashyq aýada, 30 adamǵa deıin sportshylar úshin, kórermensiz); 30 adamǵa deıin sportshylar úshin tennıs korty, kórermensiz;
-mádenıet nysandary (qyzmetkerler úshin 30 adamǵa deıin, kórermensiz);
-saýnalar, jeke monshalar, qoǵamdyq monshalar 20 jýynatyn orynǵa deıin, saǵat 10.00-den 22.00-ge deıin;
-fıtnes-ortalyqtar (10 adamnan artyq emes), SPA salondar, saǵat 12.00-den 20.00-ge deıin;
-2020 jyldyń 20 maýsymynan bastap balalarǵa arnalǵan nysandardy qospaǵanda, saýyqtyrý jáne sanatorıı nysandarynyń (toltyrylýy nysannyń jobalyq qýatynyń 50 paıyzynan aspaıtyndaı) jumysyna ruqsat etilsin. Demalýshylardy qabyldaýdy densaýlyq jaǵdaıy týraly anyqtamalarmen jáne COVID-2019 zerthanalyq zertteýlerdiń nátıjelerimen (PTR tásilimen) júzege asyrý qajet.
Qoǵamdyq kólik barlyq sanıtarlyq-epıdemıologııalyq normalardy saqtaı otyryp, saǵat 06.00-den 21.00-ge deıin shekteýli rejım sheńberinde júretin bolady.
Qoǵamdyq kóliktiń toltyrylýy qatań túrde otyrǵyzý oryndary boıynsha bolýy tıis.
Qoǵamdyq kólik antıseptık quraldarymen qamtamasyz etilýi tıis, qoǵamdyq kólikke tek jeke qorǵaný quraldarymen (medıtsınalyq betperde, qolǵappen) kirýge ruqsat etiledi.
Taksı jeńil kóliginde 3 adamnan artyq bolmaýy tıis. Jeńil kólik te jeke qorǵaný quraldarymen (medıtsınalyq betperdelermen, qolǵaptarmen) jáne antıseptıktermen qamtamasyz etilýi tıis.
Sonymen qatar Oral jáne Aqsaı qalalarynda, aýdandardaǵy eldi mekenderde dezınfektsııalyq óńdeý sharalary júrgiziledi.
Mysaly, karantındegi emdeý mekemeleri – aptasyna 2 ret, seısenbi jáne senbi kúnderi;
-azyq-túlik bazarlary – kún saıyn;
-trotýarlar, aıaldama pavılondary, alańdar, saıabaqtar, gúlzarlar, konteınerlik alańdar – kún saıyn;
-memlekettik mekemeler men jumysy toqtatylmaǵan ózge de uıymdardyń ǵımarattary – aptasyna bir ret;
-turǵyn úı kvartaldarynyń aýla aýmaqtary men turǵyn úı kireberisteri - Oral qalasy men aýdandardyń turǵyn úı-kommýnaldyq sharýashylyq, jolaýshylar kóligi men avtomobıl joldary bólimderiniń basqarýymen jáne keste boıynsha.
Dezınfektsııa júrgizý kezinde densaýlyqqa zııan kelmeýi úshin óńdeýden keıin 5 saǵat ishinde turǵyndarǵa dalaǵa shyqpaýǵa keńes beriledi.
Eske sala keteıik, budan buryn Oraldaǵy birqatar bazarda sanıtarlyq talaptyń saqtalmaǵanyn jazǵan bolatynbyz.