BQO-da 148 adam medıtsınalyq baqylaýǵa alynǵan
ORAL. QazAqparat – Batys Qazaqstan oblysynda 148 adam medıtsınalyq baqylaýǵa alynǵan, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaevtyń aıtýynsha, sonyń ishinde 1 «a» sanatyna kiretin elderden kelgen 24 adam karantınge jatqyzylǵan.
Qalǵan 124-i úıden baqylanýda.
22 naýryz kúni Máskeý – Aqtóbe reısimen ushyp kelgen aqtóbelik áıelden koronavırýs anyqtalǵany málim. Osy reıspen batysqazaqstandyq tórt turǵyn da kelgen. Bulardan koronavırýsqa alynǵan test teris nátıje kórsetkenimen, olar da karantınde jatyr.
Nur-Sultan jáne Almaty qalalarynan ishki áýe reısterimen jáne temir jolmen kelgen barlyq jolaýshylar da baqylaýǵa alynǵan. Sondaı-aq Reseı Federatsııasymen shekaralas bes avtobekette sanıtarlyq qadaǵalaý kúsheıtildi.
Eske sala keteıik, budan buryn BQO-da kórshiles óńirlermen shekarada sanıtarlyq beketter jumys istep jatqanyn jazǵan bolatynbyz.
