BQO-da 147 qatty turmystyq qaldyqtar polıgonynyń tek 22-siniń ruqsat qujattary bar

ORAL. KAZINFORM – Batys Qazaqstan oblysynda qatty turmystyq qaldyqtar polıgondarynyń birqatary zań talaptaryna sáıkes kelmeıdi.

Oblys prokýrory Nurbek Ulasbekulynyń tóraǵalyq etýimen ótkizilgen alqa otyrysynda málim bolǵanyndaı, óńirde 147 polıgonnyń tek 22-siniń ruqsat qujattary rásimdelgen. Qalǵan 125 nysannyń jer telimderine ǵana qujattary bar. Bul qaldyqtar aınalymyn basqarýda problema bar ekenin kórsetedi.

Alqa otyrysynda polıgondardyń zań talaptaryna sáıkes kelmeý sebepteri, sondaı-aq jergilikti atqarýshy jáne ýákiletti organdardyń qyzmetindegi kemshilikter jan-jaqty qarastyryldy.

Talqylaý barysynda mamandandyrylǵan tabıǵat qorǵaý prokýratýrasy «Taza Qazaqstan» bastamasynyń aıasynda ázirlengen «Tazalyq – bolashaqtyń kepili» jobasyn tanystyrdy. Joba qaldyqtardy jınaýdyń, suryptaýdyń jáne qaıta óńdeýdiń zamanaýı ári qaýipsiz júıesin qalyptastyrýǵa baǵyttalǵan. Bul ekologııalyq jaǵdaıdy jaqsartýdyń negizine aınala alady.

Jobanyń negizgi tásilderiniń biri – beınebaqylaý júıesine jasandy ıntellektini engizý. Mundaı ádis qaldyqtardy belgilenbegen jerlerge zańsyz tastaý faktilerin avtomatty túrde anyqtaýǵa múmkindik beredi. Kameralardan alynǵan materıaldar quqyq buzýshylardy ákimshilik jaýapkershilikke tartý úshin jedel túrde polıtsııaǵa joldanatyn bolady.

Jıynda kásipker Ashat Ramazanov qaldyqtardy qabyldaý jáne qaıta óńdeý boıynsha óziniń tájirıbesimen bólisti. Ásirese, kásiporynǵa qaldyq ótkizip otyrǵan azamattarǵa aqshalaı tólem beriletini atap ótildi, bul qaldyqtardy bólek jınaý mádenıetiniń damýyna serpin beredi.

Otyrys sońynda qorshaǵan ortanyń lastanýyn azaıtýǵa, qaldyqtardy basqarý tıimdiligin arttyrýǵa jáne óńirde «Taza Qazaqstan» qaǵıdatyn odan ári ilgeriletýge baǵyttalǵan birqatar sheshim qabyldandy.

Eske sala keteıik, budan buryn Batys Qazaqstanda karerler zańdy paıdalanylyp otyr ma, sony jazǵan bolatynbyz.