BQO-da 145 myńnan astam gektar sýarmaly jer qalpyna keltirilmek
ORAL. QazAqparat - Batys Qazaqstan oblysynda taıaýdaǵy bes jylda 145 myńnan astam gektar sýarmaly jerdi qalpyna keltirý josparlanýda, dep habarlaıdy «QazAqparat» HAA tilshisi.
Oblys ákimi Altaı Kólginovtiń aıtýynsha, sonyń 25 492 gektary turaqty sýarmaly jer bolsa, 120 299 gektary - sý jaıylmalary.
Qazirgi tańda oblysta 38 sý qoımasy (11-i respýblıkalyq, 27-si kommýnaldyq menshikte), jalpy uzyndyǵy 1 700 km 91 iri gıdrotehnıkalyq qurylymdar men arnalar bar. Solardyń kópshiligi jańǵyrtýdy qajet etedi. Osy baǵytta 2016 jyly keshendi jumystar qolǵa alyndy. Mysaly, Syrym aýdanynda 2 myńnan astam gektar jerdi qamtıtyn Óleńti sýlandyrý júıesin qaıta qurý (108,7 mln. teńge) bastaldy. Bul joba bıyl márege jetpek. Sondaı-aq Toǵanas aýylynda Sholaq ańqaty sý qoımasyn kúrdeli jóndeý (103,4 mln. teńge) aıaqtalady. Terekti aýdanynda uzyndyǵy 42 km Jaıyq-Shalqar arnasy qaıta qurylady. Jánibek aýdanynda quny 409,1 mln. teńgeni quraıtyn, 1,8 myń gektar jerdi qamtıtyn Ábdilman jáne Sorkól sý jaıylmalary ýchaskesin qalpyna keltirýdiń qujattamasy jasaldy.
«Óńirdegi mańyzy zor, basym jobanyń biri - uzyndyǵy 180 km Kırov-Shejin arnasyn qaıta qurý. Bul osy arna boıynda ornalasqan tórt aýdannyń 90 myń ga jaıylymdyq jerlerin sýlandyrýǵa múmkindik beredi. Onyń eki kezeńi bitti. Endi jańa arna qazylyp, úshinshi kezeńi bastalady», - dedi ákim.
