BQO-da 14 jastaǵy qyzdyń júkti bolýyna baılanysty tergeý júrgizilip jatyr
ORAL. KAZINFORM — Batys Qazaqstan oblysy Jańaqala aýdany Qyzyloba aýyldyq okrýginde 14 jastaǵy qyzdyń júkti bolǵany jóninde áleýmettik jelide aqparat tarady.
BQO turǵyny Jalǵas Nyǵmetovtiń Facebook áleýmettik jelisindegi paraqshasynda málim etkenindeı, oqıǵa bıylǵy aqpan aıynda bolǵan.
Onyń sózine qaraǵanda, qyz aýylda ájesimen birge, al jasóspirimniń anasy qalada turady.
Osyǵan oraı Kazinform tilshisi BQO polıtsııa departamentine habarlasqan edi.
Departamenttiń baspasóz qyzmeti bul derek boıynsha tergeý amaldary bastalǵanyn rastady.
— Mundaı faktiler boıynsha sotqa deıingi tergeý júrgiziledi. Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparattar, sondaı-aq kámeletke tolmaǵannyń quqyqtaryn qorǵaý maqsatynda jarııa etýge jatpaıdy, — delingen resmı jaýapta.
Eske sala keteıik, budan buryn Oralda septıkke qulap ketken 8 jastaǵy qyzdyń kóz jumǵanyn jazǵan edik.
