BQO-da 14 mln teńgeni zańsyz ıemdengen alaıaqtyń isi sotqa joldandy

ORAL. KAZINFORM — BQO boıynsha ekonomıkalyq tergep-tekserý departamenti shetel valıýtasyn iri mólsherde ótkizý deregi boıynsha aıyptalǵan I. degen azamatqa qatysty isti sotqa joldady. 

Departamenttiń baspasóz qyzmetinen málim etkenindeı, atalǵan azamat 2024 jyldyń kúzinde 25 myń AQSh dollary jáne 10 myń eýro kóleminde jalǵan shetel valıýtasyn odan ári paıdalaný maqsatynda satyp alǵan.

Osylaısha, 30 qyrkúıek pen 3 qazan aralyǵynda jalǵan valıýtany teńgege aıyrbastap, «Loto Club» qosymshasyndaǵy shottardy tolyqtyrǵan.

Budan keıin lotereıaǵa bás tigý nátıjesinde utysty Qazaqstan valıýtasymen, ıaǵnı teńgemen alǵan.

Sóıtip ol alaıaqtyq áreketter nátıjesinde 14 mln teńgeni zańsyz ıemdengen.

— Aıyptalýshynyń bul áreketteri QK 231-baby (jalǵan shetel valıýtasyn ótkizý) jáne 190-baby (alaıaqtyq) boıynsha saralanyp, sotqa joldandy. Qylmystyq is Oral qalalyq sotynda qaralyp, úkim shyǵarylatyn bolady, — dep habarlady vedomstvodan.

Eske sala keteıik, budan buryn Oralda 33 jastaǵy turǵynnyń adamdardy qorqytyp, aqsha bopsalaýmen aınalysqanyn jazǵan bolatynbyz.