BQO-da 14 mekteptiń oqýshylary ınformatıka sabaǵynda sýıtsıd pen zorlyq jaıly vıdeo kórgen
Batys Qazaqstan oblysy Terekti aýdanynyń prokýratýrasy júrgizgen taldaý kezinde kámeletke tolmaǵan oqýshylardyń bilim mekemesiniń qabyrǵasynda (14 mekteptiń ınformatıka kabınetinde) tyıym salynǵan ınternet-kontentke erkin qol jetkizý faktileri anyqtaldy, dep habarlaıdy Kazinform.
Osylaısha kámeletke tolmaǵandardyń ártúrli sýıtsıd pen zorlyq-zombylyq kórinisteri bar saıttarǵa erkin kirý múmkindigi belgili boldy.
Jol berilgen buzýshylyqtar úshin oblystyń bilim salasyndaǵy sapany qamtamasyz etý departamentine prokýrorlyq qadaǵalaý aktisi engizildi.
Onyń nátıjesi boıynsha 14 mektep dırektory Ákimshilik quqyq buzý týraly kodekstiń 409-babynyń 7-2-bóligi boıynsha ákimshilik jaýapkershilikke tartyldy.
Búgingi tańda prokýrorlyq qadaǵalaý aktisimen aýdannyń búkil bilim mekemelerinde osyndaı ınternet-saıttarǵa kirýge shekteý qoıyldy.
