BQO-da 136 mektep mýzeıi jumys jasaıdy
ORAL. QazAqparat - Batys Qazaqstan oblysynda 136 mektep mýzeıi jumys jasaıdy. Bul týraly búgin Ortalyq kommýnıkatsııalar qyzmeti óńirlik fılıalynda oblystyq balalar-jasóspirimder týrızmi jáne ekologııa ortalyǵynyń dırektory, pedagogıka ǵylymdarynyń kandıdaty Vıktor Fomın málim etti, dep habarlaıdy «QazAqparat» tilshisi.
Onyń aıtýynsha, bul baǵytta Aqjaıyq, Zelenov, Jánibek, Bórli, Bókeı ordasy, Jańaqala aýdandarynyń mektepteri belsendilik kórsetýde. Kerisinshe Syrym, Shyńǵyrlaý aýdandary men Oral qalasy bul másele jóninen artta qalýda, olarda mektepterdiń 10-28 paıyzynda ǵana mýzeı jasaqtalǵan. Mektep mýzeıleriniń durys jolǵa qoıylmaýy jetekshilerine eńbekaqy tólenbeýine baılanysty. Osy oraıda Bórli aýdanynda ǵana oń tájirıbe bar, munda ár mektep mýzeıiniń (21 mektep mýzeıiniń 18-i qujattalǵan) jetekshisine aqy tólenedi. 
«Qazaqstan «Máńgilik elge» bet alǵan kezde ótkenimiz ben ólkemizdi tanyp-bilýdiń mańyzy zor. Osy oraıda bizdiń ortalyq «Týǵan ólkeniń kórnekti oryndarynan - Qazaqstannyń qasıetti jerlerine» atty týrıstik-ekskýrsııalyq marafondy josparlaǵan bolatyn. Alaıda bıýdjettik ótinimniń oblystyq bilim men ekonomıka jáne bıýdjettik josparlaý basqarmalarynda jatqanyna eki jyl boldy. «EKSPO-2017» kórmesi ótetin jyly atalmysh sharany qolǵa alsaq, durys bolar edi», dedi Vıktor Fomın.
Aıta keteıik, qazirgi kezde respýblıkada 37 týrızm ortalyǵynda balalardyń 2,6 paıyzdan astamy qamtylǵan. Bul jóninen Batys Qazaqstan oblysy edáýir alda. Óńirde 14 týrızm ortalyǵy men stansasy bolsa, qamtý kórsetkishi - 12,6 paıyz. Bul rette Aqjaıyq jáne Jánibek aýdandaryn (36,2 jáne 39,2 paıyz) atap ótýge bolady. 
BQO balalar-jasóspirimder týrızmi jáne ekologııa ortalyǵy Qazaqstan ǵana emes, Reseı óńirlerindegi osyndaı uıymdarmen tyǵyz baılanys jasaıdy.
Quzǵa órmeleýdi damytý baǵytynda qala men aýdandarda 22 skalodrom ornatylǵan. «Batys-West» atty BQO quramasy týrıstik kópsaıystan respýblıkalyq jarystarǵa belsene qatysyp, 2015-2016 jyldary birinshi oryndy ıelendi. Sporttyq týrızm jáne quzǵa órmeleý respýblıkalyq federatsııasynyń reıtıngisine sáıkes BQO oqýshylar quramasy kósh basynda keledi. 2020 jylǵy Tokıo Olımpıadasynyń baǵdarlamasyna engizilgen quzǵa órmeleýdi odan ári damytý úshin Oral qalasynda eýropalyq deńgeıdegi jańa oryn salý qajet.
