BQO-da 133 myń tonna ónim shetelge eksporttaldy

ORAL. QazAqparat – Batys Qazaqstan oblysynda jyl basynan beri 133,8 myń tonna dándi daqyldar, júgeri jáne nut ónimderi shetelge jóneltildi, dep habarlaıdy QazAqparat.

BQO aýyl sharýashylyǵy basqarmasy egin sharýashylyǵy bóliminiń basshysy Qýanyshqalı Esimovtiń aıtýynsha, sonyń ishinde Ózbekstanǵa – 110,4 myń tonna, Aýǵanstanǵa – 11,5 myń tonna, Tájikstanǵa 7,8 myń tonna ónim eksporttaldy.

Bıylǵy 11 aıdyń ishinde Aýǵanstanǵa – 14 myń tonna, Reseıge – 9,8 myń tonna, Túrkmenstanǵa 5,2 myń tonna Aq Jaıyq astyǵy jóneltildi.

Sondaı-aq 56,2 myńnan astam tonna kúnbaǵys eksporttalsa, sonyń basym bóligi, ıaǵnı 35 myń tonnasy Ózbekstanǵa, 5 myń tonnasy Qytaıǵa, 2,5 myń tonnasy Tájikstanǵa ketti.

Qytaı batysqazaqstandyq «Terekti maı zaýytynan» 2,5 myńnan astam tonna kúnbaǵys maıyn satyp aldy.

Oblysta eginmen 600 sharýashylyq aınalysady, sonyń ishinde 200-den astamy kókónis ósirýge den qoıǵan. Bıyl 228 myń gektarǵa – dándi daqyldar, 118,1 myń gektarǵa – maıly daqyldar, 4,1 myń gektarǵa – kartop, 3331 gektarǵa kókónis egildi.

Qýanyshqalı Esimovtiń sózine qaraǵanda, bıyl astyq óndirýshiler úshin qolaıly jyl boldy. Tótenshe jaǵdaı men karantındik sharalarǵa qaramastan, fermerler kedergisiz júrip-turdy. Janar-jaǵar maımen, qosalqy bólshektermen qamtýda irkilis bolǵan joq. Sonyń nátıjesinde kóktemgi egis jumystary, kúzgi jıyn-terin ýaqtyly atqarylyp, dándi daqyldardyń jalpy ónimi 292 myń tonnaǵa jetti. Bul ótken jylǵydan 30 myń tonnaǵa artyq. Ár gektardan alynǵan ortasha ónim ótken jylǵydan (9,9 tsentner) 3 tsentnerge ósip, 12,9 tsentnerden aınaldy. Ásirese, kúzdik bıdaıdyń ár gektaryna 24,8 tsentnerden keldi. Bul kúzdik bıdaı egýdiń tıimdiligin kórsetedi.

Dıqandar aldaǵy jyldyń óniminen de úmitti. Sondyqtan bıyl jospardaǵy 86 myńnyń ornyna 95,2 myń gektar alqapqa kúzdik bıdaı egildi. Ótken jyly egin sharýashylyqtary 81 myń gektarǵa kúzdik bıdaı sepken edi.

«Bıyl álemdik naryqta aýyl sharýashylyǵy taýarlaryna qolaıly baǵa qalyptasqanyn aıta ketý kerek. Fermerler kúzdik bıdaı men kúnbaǵysty kóbirek egýdiń paıdasyn kórdi. Ótken jyly kúzde maıly daqyldardyń ár tonnasyna bastapqy baǵa 70 myń teńge bolsa, bıyl 140 myń teńgege jetti. Dándi daqyldarǵa da baǵa 70 myńnan 95 myń teńgege deıin ósti. Bul batysqazaqstandyq taýar óndirýshilerge óz ónimderin shetelge tıimdi baǵamen satýǵa múmkindik berdi», dedi QazAqparat tilshisine Qýanyshqalı Esimov.

Eske sala keteıik, budan buryn Batys Qazaqstanda 250 myń tonnaǵa jýyq astyq jınalǵanyn jazǵan bolatynbyz.