BQO-da 122 myńnan astam adam koronavırýsqa qarsy egildi
ORAL. QazAqparat – Batys Qazaqstan oblysynda 122 187 adam koronavırýsqa qarsy vaktsınanyń birinshi komponentimen egildi, dep habarlaıdy QazAqparat tilshisi.
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 91 092-si Spýtnık V, 1959-y QazVac, 22 901-i Hayat-Vax, 6235-i CoronaVac vaktsınasyn qabyldady.
Oǵan qosa 71 502 adam vaktsınanyń ekinshi komponentimen egilip úlgerdi.
Arman Talǵatulynyń sózine qaraǵanda, osy kezge deıin oblysqa 320 050 doza (188 myńy – І, 132050-i – ІІ komponent) kelip tústi. Sonyń 247 050-i (151,5 myńy – І, 95 550-i – ІІ komponent) – reseılik «Spýtnık V» vaktsınasy. 7 myńy – otandyq QazVac, 50 myńy Birikken Arab ámirlikterinde óndirilgen Hayat-Vax, 16 myńy – qytaılyq CoronaVac vaktsınasy.
«Oblysta koronavırýs juqtyrǵandar sany kún saıyn kóbeıip otyr. Sondyqtan odan qorǵanýdyń tıimdi joly karantındik talaptardy tolyq saqtaý jáne vaktsına alý ekenin turǵyndar esine salamyz. Oblys medıtsına uıymdarynda egý kabınetteri demalys kúnderi de jumys jasaýda», dedi A.Qalıbekov.
Qazirgi tańda óńirde 1 459 tósektik 20 ınfektsııalyq statsıonarda 731 adam emdelýde. Al 97 tósektik jansaqtaý bólimshelerinde 54 naýqas em qabyldap jatyr.
Osyǵan deıin 19 aýrýhana bolsa, oǵan 136 tósektik taǵy bir statsıonar qosyldy. Jansaqtaý bólimshelerindegi tósek sany da 86-dan 97-ge kóbeıtildi.
Pandemııa bastalǵannan beri oblys boıynsha koronavırýs juqtyrǵan 26 379 adam tirkelip, olardyń 78,6 paıyzy (20 735-i) jazylyp shyqty. 420 adam kóz jumdy.
Eske sala keteıik, BQO-da koronavırýspen aýyrǵandar sany 40 paıyzǵa óskenin, ınfektsııalyq statsıonar 54 paıyzǵa tolǵanyn jazǵan bolatynbyz.
