BQO-da 120-dan astam adam arnaýly jıynǵa qatysýǵa nıet bildirdi
ORAL. QazAqparat – Batys Qazaqstan oblysynda 120-dan astam adam arnaýly jıynǵa qatysýǵa nıet bildirdi, dep habarlaıdy QazAqparat tilshisi.
BQO ákiminiń áskerı qaýipsizdik jáne qorǵanys máseleleri jónindegi kómekshisi Maqsat Muqanovtyń aıtýynsha, Qazaqstan Prezıdenti Qasym-Jomart Toqaevtyń arnaıy Jarlyǵyna sáıkes áskerı qyzmetke jaramdylar tótenshe jaǵdaı talaptaryn saqtaýǵa, kóktemgi sý tasqynymen kúreske jáne basqa da sharalarǵa jumyldyrylatyn bolady.
«Qazirdiń ózinde oblys boıynsha 120-dan astam adam arnaýly jıynǵa qatysýǵa tilek bildirdi. Árıne, nıet bildirgender komıssııadan ótse ǵana áskerı qyzmetke qabyldanady. Buryn áskerde bolmaǵandar, áıel adamdar, kúndizgi bólimde oqıtyn stýdentter alynbaıdy. Komıssııadan ótkender basqa óńirge jiberilmeıdi. Osy oblys ishinde qoǵamnyń qaýipsizdigin saqtaý, dezınfektsııalaý jáne basqa qajetti jumystarǵa qatysyp, blokposttarda qyzmet atqarady», - dedi Maqsat Muqanov.
Áskerı qyzmetke shaqyrylýshylardy jergilikti bılik oryndary tamaqpen, kıim-keshekpen, jalaqymen, ıaǵnı barlyq jeńildikpen qamtamasyz etedi. Olardyń jumys orny, eńbekaqysy saqtalady. Al jumyssyz júrgender, ózin-ózi qamtamasyz etýshiler ortasha jalaqy (42 500 teńge) alady.
Bulardyń bári arnaıy qabyldanatyn oblys ákiminiń qaýlysynda kórsetiledi.
Áskerge alynǵandardyń turǵynjaıy da sheshiledi. Olar óz úılerinen qatynap ta jumys isteı alady.
