BQO-da 12 densaýlyq saqtaý nysanyn salý men jaraqtandyrýǵa 8,4 mlrd teńge bólindi

ASTANA. QazAqparat – Batys Qazaqstan oblysynda 50 medıtsınalyq-sanıtarlyq alǵashqy kómek nysany salynady. Bul týraly Ortalyq kommýnıkatsııalar qyzmetinde ótken baspasóz máslıhatynda oblys ákimi Narıman Tóreǵalıev aıtty, dep habarlaıdy QazAqparat tilshisi.

«Aýyldyq densaýlyq saqtaý salasyn modernızatsııalaý» pılottyq ulttyq jobasy aıasynda oblysta 50 medıtsınalyq-sanıtarlyq alǵashqy kómek nysanyn salý josparlap otyrmyz. Bıyl 12 nysandy qurylys-montajdaý jumystary men materıaldyq-tehnıkalyq jaraqtandyrýǵa respýblıkalyq bıýdjetten 8,4 mlrd teńge qarajat qarastyryldy. Odan bólek KPO b.v. kompanııasynyń áleýmettik mindettemeler aıasynda 25 mlrd teńgege myńnan astam qajetti medıtsınalyq qural-jabdyqtar alynady», - dedi Narıman Tóreǵalıev.

Onyń aıtýynsha, oblys boıynsha 247 dáriger tapshylyǵynyń máselesin sheshý úshin ótken jyly jergilikti bıýdjetten talapkerlerge 55 grant, respýblıkalyq bıýdjet arqyly rezıdentýraǵa 88 grant bólindi.

«Jalpy, kadr máselesin sheshý baǵytynda jumys istep jatyrmyz. Óńirimizge mamandar tartý basty maqsatymyz. Sondyqtan bul máseleni de birtindep sheshemiz», - dedi óńir basshysy.