BQO-da 12,5 myńdaı oqýshy 1-synypqa qabyldanbaq
ORAL. QazAqparat - Batys Qazaqstan oblysynda aldyn ala málimet boıynsha 12 490 oqýshy 1-synypqa qabyldanbaq. Bul týraly óńirlik kommýnıkatsııalar qyzmetinde oblystyq bilim basqarmasy basshysynyń orynbasary Záýre Ǵumarova málim etti, dep habarlaıdy QazAqparat tilshisi.
Záýre Bazarǵalıqyzynyń aıtýynsha, ótken jyly 11 263 bala alǵash ret mektep tabaldyryǵyn attaǵan bolatyn.
Óńirde aldaǵy oqý jylynda 379 memlekettik jalpy bilim beretin mektepte 100 myńnan astam oqýshy bilim alady dep boljam jasalýda.
Oqýshylar sanynyń azaıyp, talapqa saı kelmeýine baılanysty 3 bastaýysh mektep jabylmaqshy.
Bıyl oqýlyqtardy satyp alý úshin jergilikti bıýdjetten 2 730 mln teńge bólindi. Oblys boıynsha jańartylǵan bilim mazmunyna kóshýge baılanysty 4, 6, 8 synyptarynyń barlyq oqýlyqtary, mektepaldy daıarlyq synyby men arnaýly mektep oqýlyqtaryna, 1 synyp dápterleri, jaratylystaný-matematıkalyq baǵyttaǵy pánderdi aǵylshyn tilinde oqytatyn jáne qosymsha oqýlyqtarǵa tapsyrys berildi. Baspalarmen kelisimsharttar jasalyp, aldyn ala tólemder júrgizildi. Oqýlyqtardy tasymaldaý osy aıdyń 10-ynan bastalady.
Bıyl jergilikti qazyna esebinen 3 bilim berý mekemesi (Oraldaǵy №19 mektep, №24 «Solnyshko» balabaqshasy, Shyńǵyrlaý aýdanyndaǵy Shyńǵyrlaý orta mektebi) kúrdeli jóndeledi.
«Respýblıkalyq bıýdjet qarjysyna Oralǵa qarasty Zachagan kentindegi «Sarytaý» shaǵynaýdanynda 900 oryndyq, Zelenov aýdany Darııan aýylynda 100 oryndyq ınternatymen 300 oryndyq mektep qoldanysqa beriledi. Sondaı-aq jergilikti bıýdjet esebinen Bókeı ordasy aýdany ortalyǵy Saıqyn aýylynda 70 oryndyq ınternat, Qaztalov aýdany Qaztalov aýylynda óner mektebi salynýda. Sheteldik ınvestıtsııa esebinen Aqjaıyq aýdany Shabdarjap aýylynda 198 oryndyq mektep qurylysy aıaqtaldy», - dedi Z.Ǵumarova.
Aıta keteıik, 1 tamyz - 30 qyrkúıek aralyǵynda «Mektepke jol» sharasy bıyl da jalǵasady.
Buǵan deıin 10 jyl ishinde 158 126 balaǵa 794 mln 967 myń teńgeniń materıaldyq kómegi kórsetildi. Ótken jyly 19 433 balaǵa 139 mln 327 myń teńge, sonyń ishinde bıýdjetten tys qarajat esebinen 10 544 balaǵa 61 mln 892 myń teńge qarjylaı jáne materıaldyq járdem berildi.
