BQO-da 11 tonna toqyma buıymdary tıelgen júk kóligi órtendi
ORAL. QazAqparat - Batys Qazaqstan oblysynda 11 tonna toqyma buıymdary tıelgen júk kóligi janyp ketti, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, oqıǵa 11 qyrkúıek kúni Syrym aýdany ortalyǵy Jympıty aýyly mańynda boldy.
«Saǵat 14.21-de 1971 jylǵy ózbekstandyq azamat aıdap kele jatqan DAF júk kóligi otqa orandy. Avtokólik 11 tonna toqyma buıymdary tıelgen tirkemesimen qosa janyp ketti. Órtti sóndirýge 10 adam 3 tehnıkamen qatysty. «Tilsiz jaý« saǵat 15.44-te oqshaýlanyp, 17.02-de tolyqtaı aýyzdyqtaldy. Zardap shekkender joq. Qazirgi kezde órttiń shyǵý sebebi, keltirilgen shyǵyn anyqtalý ústinde», dep habarlady vedomstvodan.
Eske sala keteıik, budan buryn BQO-da avtokólik 4 jylqyǵa soǵylyp, 5 adamnyń aýrýhanaǵa jetkizilgenin jazǵan bolatynbyz.
Sondaı-aq Oralda balalar úıinen qashqan 2 jetkinshek izdestirilip jatyr.
