BQO-da 108 myńnan astam adam medıtsınalyq saqtandyrýdan tys qalyp otyr

ORAL. KAZINFORM — Batys Qazaqstan oblysynda 585 849 adam nemese halyqtyń 84,4 paıyzy saqtandyrylǵan.

«Áleýmettik medıtsınalyq saqtandyrý qory» KEAQ BQO boıynsha fılıalynyń dırektory Sandýǵash Bolysbekovanyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń 393 079-y jeńildik sanatyna jatady, olardyń jarnalaryn memleket tólep otyr. 

Sandýǵash Qııasbaıqyzynyń sózine qaraǵanda, oblys boıynsha 108 085 azamattyń saqtandyrý mártebesi joq. Sonyń ishinde 25 myńnan astamy — áleýmettik jaǵynan az qamtylǵandar.
Onyń aıtýynsha, MÁMS týraly zańǵa engizilgen ózgerister men tolyqtyrýlar eń aldymen qarapaıym halyq úshin medıtsınalyq kómekti qoljetimdi etýge baǵyttalǵan. Endi jergilikti atqarýshy organdar áleýmettik ál-aýqat deńgeıi boıynsha daǵdarystyq jáne shuǵyl jaǵdaıdaǵy (D jáne E deńgeıi) sanattarǵa jatatyn azamattar úshin MÁMS jarnalaryn tóleıtin bolady. Sonymen qatar resmı jumyssyz retinde tirkelgen azamattar da jergilikti bıýdjet esebinen saqtandyrý júıesimen qamtylady. Bul sharalar óńirlerdegi halyqty jumyspen qamtý jáne áleýmettik qoldaýdy kúsheıtýge qosymsha serpin beredi.

— Zańǵa engizilgen taǵy bir ózgeris, buǵan deıin jarna tólenbegen jaǵdaıda adamnyń saqtandyrý mártebesi 3 aı ǵana saqtalatyn edi. Endi 5 jyl boıy turaqty jarna tólegen adam jumysynan aıyrylǵan jaǵdaıda bul mártebe 6 aıǵa deıin saqtalady. ıAǵnı azamattar ýaqytsha tabystan aıyrylyp qalsa da, medıtsınalyq kómeksiz qalmaıdy. Alaıda eskeretin jaıt — keıinge qalǵan aılardyń bereshegin óteý qajet bolady, — dedi S. Bolysbekova.

Onyń málimdeýinshe, sonymen birge memleket onkologııalyq aýrýlardy erte anyqtaý úshin tekserý jumystaryn kúsheıtýdi kózdep otyr. Osyǵan baılanysty 2025 jyldyń ekinshi jartyjyldyǵynan bastap onkoskrınıngter tegin medıtsınalyq kómektiń kepildik berilgen kólemi tizimine engizilip, barlyq azamattarǵa saqtandyrylǵanyna qaramastan qoljetimdi bolady. 

— Oǵan qosa buǵan deıin tek týberkýlez ben AITV-ǵa ǵana tegin tekserý jasalsa, endi sozylmaly vırýsty gepatıtter men baýyr tsırrozy, qaterli isikter, psıhıkalyq jáne minez-qulyqtyq buzylystar, orfandyq aýrýlar, jedel mıokard ınfarkti men ınsýltke kúdik týyndaǵan jaǵdaıda da konsýltatıvtik-dıagnostıkalyq kómek tegin kórsetiletin bolady, — dedi fılıal basshysy.

Eske sala keteıik, budan buryn Prezıdentttiń MÁMS týraly zańǵa túzetý engizgenin jazǵan edik.