BQO-da 1000 shaqyrymnan astam jol jóndeldi
ORAL. KAZINFORM — 2025 jyly taǵy 200 shaqyrymnan astam joldy jóndeý josparlanyp otyr, dep habarlaıdy Batys Qazaqstan oblysy ákimdiginiń baspasóz qyzmeti.
Prezıdent Qasym-Jomart Kemeluly Toqaevtyń tapsyrmasyna sáıkes, sońǵy jyldary elimizde, sonyń ishinde Batys Qazaqstan oblysynda jol-kólik ınfraqurylymyn damytý baǵytynda aýqymdy jobalar júzege asyrylyp keledi. Bul — óńirdiń áleýmettik-ekonomıkalyq damýy men turǵyndardyń ómir súrý sapasyn arttyrýdaǵy mańyzdy qadam. Atap aıtqanda, 2023-2024 jyldary aralyǵynda oblys boıynsha 1 032 shaqyrym jol jóndelip, halyqtyń ıgiligine berildi. 2023 jyly — 562 km, 2024 jyly — 470 km jol jóndeý jáne qurylys jumystary aıaqtaldy.
Memleket basshysynyń 2019 jylǵy tikeleı tapsyrmasymen bastalǵan Kaztalov, Bókeı ordasy jáne Jánibek aýdandaryn oblys ortalyǵymen baılanystyratyn 245 shaqyrymdyq jol qurylysy 2024 jyly tolyǵymen támamdaldy. 2019-2022 jyldary — 125 km, 2023 jyly — 104 km jáne 2024 jyly — sońǵy 16 km jol qurylysy aıaqtalyp, paıdalanýǵa berildi. Ásirese, oblys ortalyǵynan 500 shaqyrym qashyqtyqta ornalasqan Jánibek aýdany úshin bul — tarıhı oqıǵa. Jol qatynasynyń jaqsarýy aýdan turǵyndarynyń ómir sapasyn arttyryp, jedel járdem, mektep, bıznes jáne basqa da qyzmetterdiń qoljetimdiligin edáýir jeńildetti.
— Bıylǵy jyly da bul baǵyttaǵy jumys jalǵasyp jatyr. 2025 jyly taǵy 200 shaqyrymnan astam joldy jóndeý josparlanyp otyr. Jol salý — jaı ǵana ınfraqurylym emes, bul — qaýipsizdik, jaılylyq jáne bolashaqqa jol ashý. Bul jumystar arqyly oblys ishindegi kólik qozǵalysy jaqsaryp, aýyl sharýashylyǵy ónimderin tasymaldaý jeńildeıdi, óńirlik ekonomıkanyń damýyna serpin beredi, — dep atap ótti oblys ákimdigi.
Buǵan deıin BQO-da quny 53 mln teńge turatyn 10 turǵyn úı memlekettik menshikke tirkelmegeni anyqtaldy.