BQO-da «100 jańa esim» jobasyna irikteý jumystary júrgizilýde
ORAL. QazAqparat - Elbasynyń «Bolashaqqa baǵdar: rýhanı jańǵyrý» maqalasyna sáıkes Batys Qazaqstan oblysynda «100 jańa esim» jobasyna irikteý jumystary júrgizilýde, dep habarlaıdy «QazAqparat» tilshisi.
BQO ákimi apparaty janyndaǵy «Qoǵamdyq kelisim» KMM basshysynyń mindetin atqarýshy Jamal Ihsanovanyń aıtýynsha, óńirde 24 adamnan turatyn jumys toby quryldy. Top quramyna Qazaqstan halqy assambleıasynyń músheleri, oblystyq qoǵamdyq kelisim, aqsaqaldar, analar keńesiniń ókilderi, oblystyq máslıhat depýtattary, «Azamattyq alıans» zańdy tulǵalar ókilderi, joǵary oqý oryndarynyń rektorlary, oblystyq kásipodaqtar keńesiniń músheleri, oblystyq basqarma, kásiporyn basshylary, buqaralyq aqparat quraldarynyń ókilderi endi. Búgingi tańda jumys tobynyń eki otyrysy ótkizilip, «100 jańa esim» jobasynyń tujyrymdamalyq negizdemesi jáne jumys tobynyń naqty is-sharalar jospary bekitildi. Bekitilgen jumys jospary boıynsha atqarylatyn jumys birinshi irikteý, ekinshi ilgeriletý kezeńderine bólindi. Sonymen qatar qala, aýdan jáne aýyldyq okrýgterde 74 jumys toby qurylyp, 1480 adam osy baǵytta jumys jasaýda. Qazirgi kezde barlyq jumys toby josparǵa sáıkes jumystaryn bastap ketti.
«100 jańa esim» jobasy boıynsha naqty baǵyt-baǵdar aıqyndaldy. Birinshiden, el táýelsizdiginiń 25 jyldyǵynda qoǵam damýyna súbeli úles qosqan tulǵalar qatarynan irikteý. Ekinshiden, tizimdi jasaqtaý barysynda tulǵalardyń ómiri men áli de kópshilik bilmeıtin izgi isterin alǵa tarta otyryp, úmitkerlerdi usyný (mysaly, Bórli aýdandyq káris etnomádenı birlestiginiń tóraǵasy Vıtalıı Annyń ushaqta alǵashqy medıtsınalyq kómek kórsetýiniń arqasyndaǵy eki jolaýshynyń aman qalýy, onyń balalar úıindegi bir balany óz qamqorlyǵyna alyp, asyraýy nemese jeke kásipker Nurlybaı Joldybaevtyń óz qarajatyna Qaztalov aýdany Taldyapan aýyldyq okrýginiń Saryqudyq aýylyna feldsherlik ambýlatorııalyq pýnkt ǵımaratyn salýy).
Úshinshiden, usynylatyn úmitkerler Danııar Eleýsinov, Ekaterına Larıonova sekildi elge tanylǵan azamattar qatarynan bolmaýy tıis.
Taǵy bir aıta keter jaıt, respýblıkalyq sarapshylar toby elimizdiń basty telearnalarynyń bas prodıýserlerinen, redaktorlarynan, tanymal BAQ tilshilerinen quralady. Sondyqtan usynylatyn úmitkerlerdiń ómirlik joly halyqtyń kóńilinen shyǵatyn, jandy tebirentetin, ár azamatqa talpynys beretin, patrıottyq sezimdi kúsheıtip, rýhtandyratyn bolýy kerek. Mine, osyndaı qasıetter kórkem nemese derekti fılmniń, áleýmettik rolıkterdiń negizine enýine múmkindik beredi. Sol sebepti bul jumysqa qoǵamdyq pikir kóshbasshylaryn tartyp, jalpy jurtshylyqty jumyldyrý qajet. Osy baǵytta buqaralyq aqparat quraldarynyń (gazet, ınternet, radıo, áleýmettik jeli) róli zor. Usynylatyn úmitkerlerdiń ómiri men jetistikteri týraly beınefılmder men materıaldar respýblıkalyq jáne aımaqtyq BAQ-tarǵa jarııalanady.
«Osylaısha ár aýdan iriktep, kem degende 20 úmitkerdi bıylǵy jyldyń 10 tamyzyna deıin Qazaqstan halqy BQO assambleıasy hatshylyǵyna usynady. Sodan keıin olardy irikteý, ilgeriletý jumystary júrgiziledi. «El-jurt ultymyzdyń altyn qoryna enetin tulǵalardy bilýge tıis» dep, Elbasymyz atap ótkenindeı, halyqtyń shynaıy kóńilinen shyǵatyn tulǵalardy tańdaýda Batys Qazaqstan oblysynda da barynsha belsendi jumys atqarylatyn bolady», dedi J.Ihsanova.
