BQO-da 100 shaqyrymdyq alaman báıgede mańǵystaýlyq shabandozdyń baǵy jandy

ORAL. KAZINFORM – Aqyn, oıshyl-fılosof, Alash qaıratkeri Ǵumar Qarashtyń 150 jyldyǵyna arnalǵan is-sharalar týǵan jeri – Jánibek aýdanynda máresine jetti.

Aldymen «Azattyqty ańsaǵan Ǵumar Qarash» degen taqyrypta oblystyq aqyndar aıtysynda on aqyn Ǵumar Qarashtyń ómiri men shyǵarmashylyǵyn, qazaq tarıhyndaǵy ornyn jyrǵa qosty.
Dala qyzyqtary uly alamanmen túıindeldi. Talov aýyldyq okrýgine qarasty Birlik eldi mekenindegi Ǵumar kesenesinen bastalyp, aýdan ortalyǵy Jánibek aýdanyna deıin sozylǵan 100 shaqyrymdyq báıgege barlyǵy 51 at qosyldy. Sonyń 10-y ǵana kómbeden kórindi.

Báıge qorytyndysynda mańǵystaýlyq shabandoz Nursultan Qumarov tizgindegen «Muzdaı» tulpary máre syzyǵyn birinshi bolyp qıdy. Sóıtip ol bas júlde – avtokólikti jeńip aldy.

Batys Qazaqstan oblysy Bókeı ordasy aýdanynyń namysyn qorǵaǵan Nurmuhanbet Ǵınııat «Erke tory» sáıgúligimen ekinshi orynǵa (kvadratsıkl) ıe boldy.

Aqtaý qalasy Jetibaı aýylynan kelgen Aman esimdi shabandoz «Qos turanymen» úzdik úshtikke iligip, oǵan mototsıkl buıyrdy. Sondaı-aq tórtinshi jáne besinshi oryn alǵandarǵa 100 myń teńgeden qarjylaı syılyq tabys etildi. 

Eske sala keteıik, budan buryn BQO-da Juban Moldaǵalıevtiń 105 jyldyǵyna oraı jańa kitaptyń tusaýy kesilgenin jazǵan edik.