BQO-da 100 myńnan astam adam jer kezeginde tur
ORAL. QazAqparat - Batys Qazaqstan oblysynda jeke turǵyn úı salýǵa jer telimin alý úshin 100406 adam kezekte tur, dep habarlaıdy «QazAqparat» tilshisi.
BQO qurylys basqarmasynan túsken málimetke qaraǵanda, sonyń 70500-i Oral qalasynda tirkelgen. Osy oraıda «Nurly jer» baǵdarlamasy baǵyttarynyń biri jeke turǵyn úı qurylysyn damytý bolyp tabylady. Bul rette dúnıe júzindegi jetekshi qalalardyń úlgisimen, biryńǵaı sáýlet stılimen jeke turǵyn úıler salý oılastyrylýda. Salynǵan baspanalar birinshi kezekte jer kezeginde turǵandarǵa satylatyn bolady. Zaıym berý men olardyń tólemge qabilettiligin «Qazaqstan turǵyn úı qurylys jınaq banki» AQ anyqtaıdy. Jeke turǵyn úı qurylysy jónindegi qanatqaqty joba Terekti aýdany Toqpaı aýylynda iske asyrylmaqshy. Onda 225 jer telimine elektr jelisi tartylǵan. Sýmen, gazben qamtý jáne abattandyrý jobalary jasalady. Osyndaı baǵyttaǵy jobalardy Terekti, Zelenov, Bórli aýdandarynyń qalaǵa jaqyn eldi mekenderinde júzege asyrý josparlanýda. Biryńǵaı úlgidegi jeke turǵyn úıler qurylysyn 2018 jyly bastaý kózdelýde. Sonymen qatar jer telimderin burynǵysha kezek boıynsha berý de toqtatylmaıdy.
Aıta keteıik, jasalǵan jobalar baǵdarlamaǵa qatysýshylarǵa tanystyrylady. Sodan keıin turǵyn úı qurylysyn jergilikti atqarýshy organdar men «Qazaqstan turǵyn úı qurylys jınaq banki» AQ-nyń kelisimimen kompanııalar júrgizedi.
