BQO-da býhgalter 106 mln teńge bıýdjet qarjysyn qumar oıynǵa jumsaǵan
ORAL. KAZINFORM — Batys Qazaqstan oblysynda sot veterınarlyq stantsııanyń bas býhgalterin senip tapsyrylǵan múlikti ıemdenip, jymqyrý boıynsha kináli dep tapty.
BQO sotynyń baspasóz qyzmetinen málim etkenindeı, tergeý organdary BQO ákimdiginiń veterınarııa basqarmasyna qarasty Kaztalov aýdandyq veterınarııalyq stantsııasynyń bas býhgalteri B-ǵa bótenniń senip tapsyrylǵan múlkin ıemdený jáne ysyrap etý (Qylmystyq kodekstiń 189-baby, 4-bóligi, 2-tarmaǵy) aıybyn taqty.
B. memlekettik fýnktsııalardy oryndaýǵa ýákilettik berilgen adamdarǵa teńestirilgen tulǵa bola otyryp, óziniń qyzmettik ókilettigin paıdalanyp, 2021-2025 jyldar aralyǵynda jalaqy, saýyqtyrý járdemaqysy jáne issapar shyǵystary túrinde bıýdjet qarajatyn zańsyz ári negizsiz joǵary mólsherde aýdaryp otyrǵan.
Nátıjesinde ol 106 mln 647,070 myń teńge kólemindegi bıýdjet qarajatyn ıemdenip, ony óziniń jeke maqsattaryna, sonyń ishinde býkmekerlik keńseler arqyly qumar oıyndarǵa jumsaǵan.
Sottalýshynyń kinási jábirlenýshi ókiliniń, kýálardyń aıǵaqtarymen, sarapshynyń qorytyndysymen, sondaı-aq sotqa deıingi tergep-tekserý barysynda alynǵan zattaı dáleldemelermen tolyq dáleldendi.
Aıyptaýshy sottan B-ǵa múlkin tárkileı otyryp, 8 jyl merzimge bas bostandyǵynan aıyrý jazasyn jáne belgili bir laýazymdardy atqarý quqyǵynan ómir boıyna aıyrý túrindegi qosymsha jaza taǵaıyndaýdy surady.
B. óz kinásin tolyq moıyndady.
- Kaztalov aýdandyq soty jasalǵan sybaılas jemqorlyq qylmysynyń mán-jaılaryn, ótelmegen asa iri mólsherdegi keltirilgen zalaldy eskere otyryp, B-ny 7 jyl merzimge bas bostandyǵynan aıyrýǵa úkim shyǵardy. Sondaı-aq qylmystyq jolmen alynǵan múlki tárkilendi. Oǵan qosa memlekettik qyzmette, sýdıa laýazymynda, jergilikti ózin-ózi basqarý organdarynda jáne basqa vedomstvolarda laýazymdardy atqarý quqyǵynan ómir boıyna aıyryldy. Sonymen qatar 105 mln 736,1 myń teńge mólsherinde azamattyq talap-aryz qanaǵattandyryldy. Úkim zańdy kúshine engen joq, - dep naqtylady BQO sotynyń baspasóz qyzmeti.
Eske sala keteıik, budan buryn BQO-da ańshylyq kezinde aýyldasyn atyp óltirgen turǵynǵa úkim shyqqanyn jazǵan edik.
