BQO-da 100-ge jýyq balany kúıik shalǵan
ORAL. QazAqparat - Batys Qazaqstan oblysynda balalar arasynda jaraqat alý azaıar emes. Bul týraly oblystyq densaýlyq saqtaý basqarmasynda balalar men jasóspirimder arasynda jol-kólik oqıǵasynan jáne turmystyq jaraqat alýdyń aldyn alý máselelerine arnalǵan dóńgelek ústel otyrysynda aıtyldy, dep habarlaıdy «QazAqparat» tilshisi.
Oral qalalyq ishki ister basqarmasy jergilikti polıtsııa qyzmetiniń ınspektory Dınara Ábdilqalyqovanyń sózine qaraǵanda, balalardy jol-kólik oqıǵalarynan saqtandyrý úshin, ásirese, sáýir-mamyr aılarynda aldyn alý sharalaryn kóbirek júrgizý kerek. Osy mezgilde kólik tasqyny artyp, balalar kóshege jıirek shyǵady. Bıyl jyl basynan beri oblysta jasóspirimderdiń qatysymen 8 jol-kólik oqıǵasy tirkelip, sonyń saldarynan bir bala kóz jumdy.
Oblystyq densaýlyq saqtaý basqarmasynyń baspasóz hatshysy Flıýra Samatovanyń málim etkenindeı, bıyl 5 jasar sábı túnde besikte jatyp, tunshyǵyp qaıtqan. Sondaı-aq 54 bala tynys alý organdaryna túrli zatty tyǵyp jiberse, 99-yn kúıik shalǵan. 68 balany janýarlar tistep alǵan. Oǵan qosa balalarǵa qatysty 301 zorlyq-zombylyq deregi tirkelgen. Munyń bári ata-analardyń óz balalaryna nemquraıly qaraýynan, baqylaýsyz qaldyrýynan bolyp otyr.
Jıynda sondaı-aq oblystyq salamatty ómir saltyn qalyptastyrý máseleleri ortalyǵynyń dırektory Zııada Moldaǵalıeva 7 sáýir - Dúnıejúzilik densaýlyq saqtaý kúnine oraı mindetti áleýmettik saqtandyrý aıasynda bekitý naýqanynyń bastalǵany jóninde málimdedi. Oblystyq densaýlyq saqtaý basqarmasynyń bólim basshysy Gúlnár Ábdirahmanovanyń aıtýynsha, 5 sáýirden 31 maýsymǵa deıin elimizde bekitý naýqany júrgizilmek. Osy ýaqyt ishinde ár adam mekenjaıy boıynsha emhanaǵa tirkelýi kerek. Al 2018 jylǵy 1 qańtardan bastap memleket tóleıtin sanatqa kiretin azamattar mindetti áleýmettik medıtsınalyq saqtandyrý aıasynda medıtsınalyq kómek alatyn bolady.
