BQO-da 100-ge jýyq qyzmetshige eńbek demalysy aqysy merziminde tólenbegen

Memlekettik qyzmet isteri agenttigi BQO boıynsha departamentiniń basshysy Murat Baısalovtyń óńirlik kommýnıkatsııalar qyzmeti alańynda ótken brıfıngte málim etkenindeı, monıtorıng barysynda sondaı-aq 153 memlekettik qyzmetshige tıisti 13,5 mln teńgeniń issapar somasy ýaqytyly berilmegen.

Murat Seıilbekulynyń sózine qaraǵanda, mysaly, derbes memlekettik qyzmetshilerge issapar somalary 1 aıdan, keıbir jaǵdaılarda, tipti 3 aıdan keıin tólengen.

— Bul memlekettik qyzmetshilerdiń quqyqtaryn óreskel buzý bolyp esepteledi. Óıtkeni mundaı buzýshylyqtar olardyń óz qarajattaryn joıýyna alyp keledi ári sybaılas jemqorlyq táýekelderin týyndatady. Shyn mánisinde tólem issapar aldynda jasalýy tıis. Qazirgi tańda atalǵan tólemder tolyqtaı óteldi, — dedi M.Baısalov.

Onyń aıtýynsha, departamentpen júrgizilgen jumystar nátıjesinde 653 adamnyń quqyǵy qorǵaldy. 

Sol sekildi memlekettik qyzmet týraly zańnama talaptary men qyzmettik ádep normalaryn saqtaý máseleleri boıynsha 348 ótinish túsip, sonyń 20-sy boıynsha keltirilgen dálelder ishinara jáne tolyq rastaldy. Sonyń ishinde 7 aryz ıesiniń quqyǵy qalpyna keltirildi.

Máselen, departamenttiń aralasýynan keıin T.Bektenovtyń 2026 jylǵy 17 shildegi shaǵymyn qaraý nátıjesinde «Alım» jeke kásipkerine qoldanystaǵy zańnamanyń talaptaryna saı týrıstik qyzmet obektilerin salý, rekonstrýtsııalaý kezinde kásipkerlik sýbektileri shyǵyndarynyń bir bóligi óteldi. Atap aıtqanda, BQO dene shynyqtyrý jáne sport basqarmasy kásipkerge 20 mln teńge tóledi.

Departament málimetine sáıkes bıylǵy toǵyz aıda tekserý sharalary nátıjesinde 43 myńnan astam zań buzýshylyq anyqtaldy. Soǵan jol bergen kináli 38 laýazymdy tulǵa ákimshilik, al qyzmet berýshilerdiń 37 qyzmetkeri túrli tártiptik jaýapkershilikke tartyldy.

Eske sala keteıik, budan buryn BQO-da memlekettik organdarda 219 jaqyn týystyń birge jumys isteıtini anyqtalǵanyn jazǵan edik.