BQO-da 100-den astam iri qarany urlaǵandar ustaldy
ORAL. QazAqparat - Batys Qazaqstan oblysynda 100-den astam mal urlaǵan barymtashylar ustaldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, uıymdasqan qylmystyq top 2015 jyldan beri Qaratóbe aýdany aýmaǵynda mal urlaýmen aınalysqan.
Sol mezgilden beri ákki urylar 100-den astam iri qara men jylqyny qoldy qylǵan.
Sot qaýlysymen top músheleri qamaýǵa alyndy. BQO polıtsııa departamentiniń tergeý basqarmasy QR QK 188-baby 3-bóligine sáıkes (urlyq) 20-dan astam epızod boıynsha sotqa deıingi tergeý amaldaryn júrgizýde.
Aıta keteıik, «Mal urlyǵy» respýblıkalyq jedel-aldyn alý sharasy barysynda 5-7 jeltoqsan aralyǵynda oblys aýmaǵynda 40 mal urlyǵy ashyldy. Sonyń ishinde 17-si izi sýymaı ashylsa, sonshasy - buryn jasalǵan qylmystar. Al tórteýiniń tarıhy ótken jyldarǵa ketedi.
Qysqy soǵym kezinde mal urlyǵynyń jıileıtini belgili.
Departament krımınaldyq polıtsııa basqarmasynyń bastyǵy, polıtsııa polkovnıgi Erlan Arystanovtyń sózine qaraǵanda, urlyqqa jol bermeý úshin maldy kózden tasa qaldyrmaý qajet. Jaıylymda júrgen maldy baqylaý úshin GPS-treker qurylǵysyn ornatqan tıimdi.
