BQO-da 100 adam búırek aýystyrýǵa kezek kútýde
ORAL. QazAqparat - On jyldan beri búırek dertimen naýqastanatyn zaıybym Beıbit Dáýletqalıev sońǵy kezde qatty aýyryp, qıyn jaǵdaıda qalǵan edik. Qazir jan-jaqty tekserýden ótip, mamandarǵa qaralyp, betimiz beri qarap keledi. Bul týraly Oral qalasynyń turǵyny, Qurmanǵazy atyndaǵy mýzyka kolledjiniń oqytýshysy Jannat Ámirǵalıeva málim etti, dep habarlaıdy «QazAqparat» tilshisi.
Onyń aıtýynsha, búırek aýystyrý úshin oǵan donor qajet. Onyń ústine birinshi top múgedegi Beıbit gepatıt aýrýyn da qosa jamap alǵan. Qaıyrymdylyq kontsertin uıymdastyryp kórgen eken, onyń nátıjesi oıdaǵydaı bola qoımaǵan. Aqyry osy tuıyqtan shyǵý úshin ne isterlerin bilmeı, «QazAqparat» agenttiginiń basshylyǵyna habarlasqan.
Oblystyq densaýlyq saqtaý basqarmasynyń bas mamany Ǵalııa Qulmuqanovanyń sózine qaraǵanda, qazirgi kezde oblysta osyndaı dertke shaldyqqan 200-deı adam bar. Sonyń ishinde 100 adamnan qandary alynyp, olar búırek aýystyrýǵa kezek kútýde. Beıbit Dáýletqalıev te sáıkes keletin búırek tabylsa, otaǵa jiberiletin bolady. Oǵan deıin gepatıtinen de emdeledi.
«QazAqparattan» habarlasqannan keıin Ǵalııa Mıronqyzy sol boıda óz tarapynan qozǵaý saldy. Qazir em-dom óz aldyna, gepatolog, endokrınolog syndy mamandarǵa qaralýdamyz. Osy ýaqytqa deıin týra joldy bilmeppiz. Sondyqtan bizdiń otbasymyzǵa qolushyn sozyp, kómektesken «QazAqparat» agenttigine alǵysymyzdy aıtamyz», dedi Jannat Muratqyzy.
Aıta keteıik, 30 sáýir kúni Oral qalasyndaǵy jastar shyǵarmashylyǵy ortalyǵynda Beıbit Dáýletqalıevti qoldaýǵa arnalǵan taǵy bir qaıyrymdylyq keshi ótedi.
